भक्तपुरमा नवौं राष्ट्रिय प्रतियोगिताका लागि जिल्ला खेलाडी छनोट गरिदै

भक्तपुर / जिल्ला खेलकुद विकास समिति भक्तपुरले १२ विधाको प्रदेश स्तरीय खेलका लागि जिल्लामा रहेका खेलाडी छनोट गर्ने भएको छ । जिल्ला खेलकुद विकास समिति भक्तपुरले १२ विधाका खेलहरुमा भारातोलन, एथलेटिक्स म्याराथुन,खोखो,रग्बी,टेबल टेनिस, लनटेनिस,कबडी भारातोलन, तेक्वान्दो,ह्यानबल,उसु र बास्केटबलका लागि खेलाडी छनोट गर्न लागेको एक सुचना जारि गर्दै जानकारी गराएको छ ।

प्रदेश खेलकुद परिषद बाग्मातिले प्रदेशका १३ जिल्लामा खेलाडी छनौट सुरु गर्न जिल्ला खेलकुदहरुलाई सूचना जारी गरेसंगै भक्तपुरले सो छनोटको तयारीका लागि सुचना जारि गरेको जिल्ला खेलकुद विकास समिति भक्तपुरका अध्यक्ष दिपक थापाले बताउनुभयो। गण्डकी प्रदेशको राजधानी पोखरामा यहि जेठ २२ देखि २८ गते सम्म आयोजना हुने नवौं राष्ट्रिय खेलकुद प्रतियोगिताको तयारीका लागि प्रदेश खेलकुदले जिल्ला खेलकुदहरुलाई आह्वान गरेको हो ।

पहिलो चरणमा जिल्ला छनौटको तयारी सुरु गर्न जिल्ला खेलकुदहरुलाई सूचना बाग्मती प्रदेशले पठाएको थापाले बताउनुभयो । सो सुचना संगै बैशाख २९ गते भित्र जिल्लाका सम्बन्धित खेलाडीहरु,संघ तथा प्रशिक्षकले सम्पर्क गर्न जिल्ला खेलकुद विकास समितिले सूचना जारि गरेको छ ।
नवौं राष्ट्रिय प्रतियोगितामा ३६ खेल हुने राष्ट्रिय खेलकुद परिषदले यस अघि नै निर्णय गरिसकेको छ भने केही प्रदर्शनीका रुपमा खेलहरु समावेश गरिने भएको छ ।