आगामी वर्षको बजेट कृषि उत्पादनमा केन्द्रीत हुन्छ : अर्थमन्त्री शर्मा

सरकारले आगामी आर्थिक वर्षको बजेट कृषि उत्पादन बढाउन केन्द्रीत गर्ने भएको छ । विदेशबाट बढ्दो कृषिजन्य वस्तुको आयात न्यूनीकरण गर्न स्वदेशमै कृषि उत्पादन बढाउनतर्फ आगामी आर्थिक वर्षको बजेट केन्द्रीत गरिने भएको हो । अर्थमन्त्री जनार्दन शर्माले आज प्रतिनिधिसभामा विनियोजन बजेट पेस गर्दै आगामी वर्षमा कृषि क्षेत्रलाई विषेश प्राथामिकतामा राखिने जानकारी दिए । उनले कृषि उत्पादन वृद्धि गर्न कृषि अनुसन्धान, मल, बिउ, तालिम र प्राविधि, मेसिनरी सामानमा किसानको पहुँच बढाइने जानकारी दिए । यस्तै, किसानलाई यी वस्तुको सहज उपलब्धता गराउँदै खेतीयोग्य सबै बाँझो जमिनको उपयोग गर्न विषेश योजना ल्याउने उनले बताए । यसैगरी, आन्तरिक उत्पादन बढाउन भूमिगत तथा सतह सिञ्चाइ विस्तार गर्ने योजना समेत बजेटमा समेटिने छ । किसानलाई सामुहिक सहकारी खेतीका लागि प्रोत्साहन गर्दै जग्गाको चक्लाबन्दी गरेर सामूहिक खेती प्रणालीको विकास गर्ने लक्ष्य समेत बजेटले लिने छ । कृषि उपजको बजार विस्तार गर्दै नश्ल विकास गर्ने र पशुपंछीजन्य र माछाको उत्पादन प्रबर्द्धन गर्ने लक्ष्यसमेत बजेटले लिने छ ।