विमान दुर्घटना : एकै परिवारका सात जनाको मृत्युपछि गाउँ नै शोकमा

भक्तपुर /मुस्ताङको थसाङमा दुर्घटना भएको तारा एयरको विमानमा धनुषाका एकै परिवारका सात जनाको मृत्यु भएपछि गाउँ नै शोकमा डुबेको छ । मिथिला नगरपालिका–११, लोटा गाउँका एकै परिवारका सात जना उक्त विमानमा सवार थिए । दुर्घटनामा उनीहरु सबैको मृत्यु भएको हो ।

पोखरा विमानस्थलबाट जोमसोमका लागि जहाज चढ्नुअघि राजन गोलेले बुबा–आमा, काका–काकी र मामा–माइजुको सामूहिक फोटो खिचेर मोबाइलका माध्यमबाट घरमा पठाएका थिए । परिवारका सबै सदस्यहरूको बीचमा उभिएका राजन भने फोटोमा निकै खुसी देखिएका थिए । वृद्ध बुबाआमाका साथै परिवारका अन्य ज्येष्ठ सदस्यलाई मुक्तिनाथको दर्शन गराउन लैजाँदै गरेको खुसी राजनमा देखिन्थ्यो । विमान चढ्नुअघि उनले घरमा दिदीहरू शान्ति र कान्तिलाई फोन गरेर अब विमान जोमसोमका लागि उड्यो भनेर जानकारीसमेत गराएका थिए ।