पार्टीको निर्णय कार्यान्वयन गर्न एकीकृत समाजवादी अध्यक्ष नेपालको मन्त्रीहरूलाई आग्रह

काठमाडौँ – नेकपा (एकीकृत समाजवादी) का अध्यक्ष माधवकुमार नेपालले पार्टीको निर्णय कार्यान्वयन गर्न मन्त्रीहरूलाई आग्रह गरेका छन्। शुक्रबार बसेको पार्टीको पोलिटब्युरो बैठकमा अध्यक्ष नेपालले बहालवाला मन्त्रीहरूलाई फिर्ता बोलाउन पार्टीले गरेको निर्णय कार्यान्वयन गर्न मन्त्रीहरूलाई आग्रह गरेका हुन्। उनले शनिवारसम्म मन्त्री हेरफेर भइसक्ने पनि बताए। बैठकपछि सञ्चारकर्मीसँग कुराकानी गर्दै पार्टीका प्रवक्ता जगन्नाथ खतिवडाले अध्यक्ष नेपालले पार्टीको निर्णय परिवर्तन नहुने बताएको जानकारी दिए।

उनले भने, ‘मन्त्रीहरूका सन्दर्भमा उठेका प्रश्नमा अध्यक्षले उत्तर दिँदै बैठकमा पार्टीको निर्णय कार्यान्वयन हुने। आज, भोलिभित्र कार्यान्वयन भइसक्नेजस्ता विषयमा उहाँले प्रकाश पार्नुभएको छ र यसको अन्तिम निर्णय भोलि केन्द्रीय कमिटीको बैठकले यसबारे त्यहाँ पनि उठेका प्रश्नको उत्तर दिँदा यसको ठोस कुरा म भोलि बताउनेछु भनेर अध्यक्षले भन्नुभएको छ। तर हाम्रो पूर्ववत् निर्णय, अडानलाई परिवर्तन गर्ने कुरा उहाँले भोलि बोल्ने होइन कि केन्द्रीय कमिटीको बैठक भोलि बसिरहेको अवस्थामा आजै मैले किन बोलिहालौँ भन्दै उहाँले हामीले गरेको निर्णय तपाईंहरू कार्यान्वयन गर्न आफैँ लाग्नुहोस् भनेर आज मन्त्रीहरूलाई सम्झाउनुभएको छ।’

अध्यक्ष नेपालले आगामी संघ र प्रदेशको निर्वाचनमा गठबन्धनलाई प्राथमिकता दिइने बताए। उनले गठबन्धनले आफूहरूलाई मुख्य एजेण्डा बनाएको नबनाएकोमा ध्यान दिने उल्लेख गर्दै देशका सबै निर्वाचन क्षेत्रमा उम्मेदवारी दिनेगरी तयारी गर्न नेता, कार्यकर्तालाई निर्देशन दिए।

प्रवक्ता खतिवडाले भने, ‘बैठकमा आमनिर्वाचनको तयारीका लागि अध्यक्षले जोड गर्दै हाम्रो पार्टी गठबन्धनलाई प्राथमिकता पनि दिन्छ। तर, पहिलेजस्तो गठबन्धन मुख्य कुरा हो भन्दैन। गठबन्धनले हामीलाई मुख्य एजेण्डा बनाउँछ कि बनाउँदैन भन्ने कुरामा पनि उत्तिकै ध्यान दिन्छ। र, देशका सबै निर्वाचन क्षेत्रमा आफ्नो उम्मेदवारी उठाउनेगरी तयारी गरेर लाग्छ। लाग्नु पनि पर्छ। तपार्इं कार्यकर्ता लाग्नुस् भनेर पनि आह्वान गर्नुभएको छ।’

अध्यक्ष नेपालले विगतमा कांग्रेस र नेकपा (माओवादी केन्द्र)ले गरेको व्यवहारलाई सुधार गर्न सके गठबन्धनले बढी जित हासिल गर्ने बताए। एकीकृत समाजवादीले कांग्रेस र माओवादी केन्द्रले विगतका गल्ती नदोहो¥याओस् भन्नेमा जोड दिएको अध्यक्ष नेपालको भनाइ थियो।

प्रवक्ता खतिवडाले भने, ‘नेकपा(माओवादी केन्द्र), नेपाली कांग्रेस आदिले गरेका विगतमा गरेका व्यवहारलाई करेक्सन गरेपछि मात्रै गठबन्धनले बढी सशक्तता प्राप्त गर्छ र गठबन्धनले बढी विजय हासिल गर्न सक्छ। उहाँहरूले आफूलाई करेक्सन गर्नुहोस्। विगतका गल्ती नदोहो¥याउनुहोस् भन्नेतर्फ हाम्रो पार्टीले सबभन्दा बढी फोकस गरेको छ।’ अध्यक्ष नेपालले देश अन्तर्राष्ट्रिय खेल मैदान बन्न लागिरहेको भन्दै देशभक्ति र स्वाभिमानका लागि प्रत्येक नेपालीले आवाज उठाउनुपर्ने धारणा व्यक्त गरेको एकीकृत समाजवादीका प्रवक्ता जगन्नाथ खतिवडाले जानकारी दिए।

असंलग्न परराष्ट्र नीतिमाथि बाधा पुग्ने चिजबाट जोगाउनको निम्ति पार्टीलाई परिचालित गर्नुपर्ने अध्यक्ष नेपालको धारणा रहेको उनले बताए। नेकपा (एकीकृत समाजवादी) ले शनिबार बिहान ११ बजे केन्द्रीय कमिटीको बैठक बोलाएको छ।