राष्ट्रपति भण्डारीले संविधानको उल्लंघन गरेको सत्ता गठबन्धनका दलहरुमाथी आरोप

सत्ता गठबन्धनका दलहरुले नागरिकता विधेयक प्रमाणीकरण नगरेर राष्ट्रपति विद्यादेवी भण्डारीले संविधानको ठाडो उल्लंघन गरेको आरोप लगाएका छन् । आज बालुवाटारमा बसेको गठबन्धन बैठकले संघीय संसदका दुवै सदनबाट पुनः पारित भई प्रमाणीकरणका लागि पेश भएको विधेयक अस्वीकार गरेर राष्ट्रपतिले संवैधानिक व्यवस्थामाथि नै प्रहार गरेको निश्कर्ष निकालेको हो । राष्ट्रपतिको उक्त गैरसंवैधानिक कदमबाट जननिर्वाचित संसदको अपमान र अवमूल्यन भएको गठबन्धन बैठकको ठहर छ । बैठकले राष्ट्रपतिको कदमबाट एकातिर नागरिकता प्राप्त गरिसकेका नेपाली आमाबाबुका सन्तानले नेपाली नागरिकता प्राप्त गर्ने संवैधानिक हकबाट बञ्चित भएको र अर्कोतिर संविधानसभाबाट निर्मित संविधानले व्यवस्था गरेको जनतामा निहित सार्वभौमसत्ता, संवैधानिक सर्वोच्चता र लोकतान्त्रिक शासन व्यवस्थाका आधारभूत मूल्य मान्यतामा गम्भीर प्रहार भएको निचोड निकालेको छ ।गठबन्धन दलहरुले राष्ट्रपतिको कदमविरुद्ध सचेत रहन संघीय लोकतान्त्रिक गणतन्त्रात्मक संवैधानिक व्यवस्थाका पक्षधर सबै राजनीतिक दल, नागरिक समाज, बौद्धिक समुदाय, सञ्चार जगतलगायतलाई आह्वानसमेत गरेका छन् । बैठकपछि जारी विज्ञप्तिमा प्रधानमन्त्री तथा नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवले हस्ताक्षर गर्नुभएको छ ।