प्रधानमन्त्रीले अविलम्व राजीनामा दिनुपर्छ -एमाले सांसदहरू

नेकपा (एमाले) का सांसदहरूले प्रधानमन्त्री पुष्पकमल दाहाल प्रचण्डको राजीनामा माग गरेका छन् । प्रतिनिधिसभाको सोमबारको बैठकमा आकस्मिक समयमा एमाले सांसदहरूले प्रधानमन्त्रीको अविलम्व राजीनामा माग गरेका हुन् । सांसदहरूले प्रधानमन्त्रीले बहुमत गुमाइसकेकोले सरकारमा बसिरहन नैतिक आधार गुमाइसकेको दाबी गरे ।

सरकारले प्रकोप पीडित जनताको उद्धार, राहत र पुनःस्थापनामा प्रभावकारी ढंगले काम गर्न नसकेको भन्दै छिटोभन्दा छिटो बलियो सरकार आवश्यक भएको सांसदहरूको भनाइ छ ।
एमाले सांसद विद्या भट्टराईले काम गर्न सक्ने सरकार बनाउन नयाँ सरकार बनाउने मार्ग प्रशस्त गर्न माग गरिन् ।

एमाले सांसद अच्युतप्रसाद मैनालीले विपद्ले देशभर धेरै घटनाहरू भइरहेको भए पनि सरकार कानमा तेल हालेर बसेको टिप्पणी गरे । प्रधानमन्त्री र गृहमन्त्रीले नैतिकताको आधारमा राजीनामा दिनुपर्ने उनको भनाइ छ । ‘तमाम समस्याहरूका बाबजुद आज सरकार कानमा तेल हालेर बसेको छ । म प्रधानमन्त्री तथा गृहमन्त्रीलाई नैतिकताको आधारमा राजीनामा दिन सुझाव पेस गर्छु,’ उनले भने,
एमाले सांसद किरणकुमार साहले पनि प्रधानमन्त्रीलाई राजीनामा दिन सुझाव दिए । उनले विपद्को यो समयमा बलियो र स्थिर सरकारको आवश्यकता रहेको बताए ।
एमाले सांसद वासुदेव घिमिरेले सरकारले विपद्को यो समयमा उद्धार राहत र पुनःस्थापनाको काम सरकारले अगाडि बढाउन नसकेको बताए । उनले प्रधानमन्त्रीले राजीनामा दिन आनाकानी गरिरहेको भन्दै अविलम्व राजीनामा दिएर माग प्रशस्त गर्न आग्रह गरे ।