बुढानिलकण्ठमा ह्याम्स अस्पतालद्वारा निशुल्क बाल स्वास्थ्य शिविर

काठमाडौं | ह्याम्स अस्पताल काठमाडौंको नेतृत्वमा, बुढानिलकण्ठ नगरपालिकाको सहकार्यमा, २०८१ भदौ २९ गते, शनिबार, राष्ट्रिय बाल दिवसको अवसरमा निशुल्क स्वास्थ्य शिविर सम्पन्न भएको छ। नगरपालिकाका बालबालिकाहरूको स्वास्थ्यलाई ध्यानमा राख्दै आयोजित यस शिविरमा १४० भन्दा बढी बालबालिकाहरूले विभिन्न स्वास्थ्य जाँच र उपचार सेवाहरू प्राप्त गरेका छन्।

स्वास्थ्य शिविरमा ह्याम्स अस्पतालका विशेषज्ञ चिकित्सकहरूको टोलीले बालबालिकाहरूलाई निशुल्क स्वास्थ्य जाँच गरेका थिए। शिविरमा डा. प्रोपर्टी भण्डारी, डा. सुमन चौलागाईं (नाक, कान, घाँटी रोग विशेषज्ञ), डा. रुक्मा आचार्य (बाल रोग विशेषज्ञ), डा. अर्चना पोखरेल (आँखा रोग विशेषज्ञ) र डा. सबिका महर्जन (दन्त रोग विशेषज्ञ) सहितको टोलीले बालबालिकाहरूको स्वास्थ्य परीक्षण गरी आवश्यक परामर्श र औषधि वितरण गरेका थिए।

शिविरमा सहभागी अभिभावकहरूले यस प्रकारको निशुल्क सेवा पाउँदा ठूलो राहत र खुशी महसुस गरेको बताए। “यस क्षेत्रमा स्वास्थ्य सेवा सहज रूपमा उपलब्ध नहुँदा यो शिविरले ठूलो राहत पुर्याएको छ,” एक अभिभावकले भने।

शिविरको आयोजना बुढानिलकण्ठ नगरपालिकाको सहयोगमा भएको थियो, जसले नगरपालिकाभरिका बालबालिकाहरूलाई लक्षित गर्दै स्वास्थ्य सेवा उपलब्ध गराएको थियो। आयोजकहरूको भनाइअनुसार, यो शिविरको उद्देश्य बालबालिकाहरूको स्वास्थ्य स्थिति सुधार गर्दै भविष्यमा सम्भावित स्वास्थ्य समस्याहरूलाई पहिचान गरी समयमै उपचार गर्नु रहेको छ।

ह्याम्स अस्पतालले यसअघि पनि यस्ता सामुदायिक स्वास्थ्य शिविरहरू आयोजना गर्दै आएको र भविष्यमा पनि स्थानीय समुदायलाई लक्षित गरी थप यस्ता कार्यक्रमहरू सञ्चालन गर्ने योजना रहेको अस्पताल प्रशासनले जनाएको छ।

स्वास्थ्य शिविर सफल बनाउन खटिएका सम्पूर्ण स्वास्थ्यकर्मीहरूलाई आयोजक पक्षले धन्यवाद ज्ञापन गरेको छ। यस किसिमका शिविरहरूले स्वास्थ्य सचेतना अभिवृद्धिमा महत्वपूर्ण भूमिका खेल्ने विश्वास गरिएको छ।