दशरथ रंगशालामा नेपाल र भारतबीचको खेलमा विवाद

काठमाडौं । दशरथ रंगशालामा भएको नेपाल र भारतको फुटबल खेलमा विवाद उत्पन्न भएको छ। नेपालका डिफेन्डर रेखा पौडेललाई खेलको क्रममा रातो कार्ड दिइएपछि नेपालले खेललाई १० खेलाडीमै अघि बढाएको थियो।

रातो कार्ड पाएको पाँच मिनेटपछि भारतीय टोलीले गोल गर्दै खेलमा अग्रता लिएको थियो। गोलपछि भारतीय खेलाडीहरुले उत्सव मनाइरहँदा खेल सुरु गर्ने सिठी बजिसकेको थियो। नेपाली टोली तयारी अवस्थामा हुँदा भारतीय खेलाडीहरु, विशेषतः गोलरक्षक, अझै उत्सवमै व्यस्त देखिन्थे। यो अवसरमा नेपालले बल चलाउँदै गोल गरेको थियो।

तर, रेफ्रीले गोललाई मान्यता नदिँदा दशरथ रंगशालामा विवाद उत्पन्न भएको छ। नेपाली समर्थक तथा खेलाडीहरुले रेफ्रीको निर्णयप्रति असन्तुष्टि जनाउँदै विरोध प्रदर्शन गरेपछि रंगशालामा केहीबेर तनावको स्थिति सृजना भएको थियो। भारतीय टोलीका केही खेलाडीले गोललाई अवैध ठहर गर्दा नेपाली समर्थकले विरोध स्वरुप नाराबाजी गरे।

यो विवादको कारण खेलमा केही समय अवरोध भएको छ भने रेफ्री र दुबै टोलीका व्यवस्थापकहरुबीच छलफल जारी रहेको छ।