पृथ्वीनारायण क्याम्पसप्रति गरिमाहीन टिप्पणीप्रति स्वतन्त्र विद्यार्थी युनियनको आपत्ति, क्षमायाचनासहित कडा चेतावनी

पोखरा, वैशाख १७, २०८२:कास्की जिल्लामा चिकित्सकहरूले थालेको आन्दोलन नियन्त्रणका क्रममा जिल्ला प्रशासन कार्यालयअन्तर्गत एक प्रहरी अधिकृतद्वारा दिइएको अभिव्यक्तिलाई लिएर स्वतन्त्र विद्यार्थी युनियन, पृथ्वीनारायण क्याम्पस, पोखराले कडा आपत्ति जनाएको छ। “पृथ्वीनारायण क्याम्पसमा पढेको विद्यार्थी जस्तो कुरा नगर्नु” भन्ने भनाइप्रति युनियनले गम्भीर ध्यानाकर्षण भएको जनाएको छ। उक्त टिप्पणीले देशभरबाट आएका हजारौं विद्यार्थी, प्राध्यापक, कर्मचारी र शिक्षाप्रेमीहरूको भावनामा चोट पुर्‍याएको भन्दै युनियनले सार्वजनिक रूपमा माफी माग्नुपर्ने माग गरेको हो।

स्ववियुका अध्यक्ष विष्णु पोखरेलद्वारा हस्ताक्षरित विज्ञप्तिमा शान्तिपूर्ण आन्दोलनलाई समर्थन गर्दै त्यस्ता गरिमाविहीन अभिव्यक्ति स्वीकार्य नहुने स्पष्ट गरिएको छ। विज्ञप्तिमा भनिएको छ, “देशका सबै क्षेत्रका दक्ष जनशक्ति उत्पादन गर्दै आएको यो क्याम्पसको सम्मान गर्न साटो अपमानजनक अभिव्यक्ति दिनु दु:खद छ।” युनियनले यस प्रकारको विवादास्पद अभिव्यक्तिप्रति असहमति जनाउँदै सम्बद्ध अधिकारीलाई जिम्मेवारीका साथ अभिव्यक्ति दिन आग्रह गरेको छ।

क्याम्पसको गरिमा र विद्यार्थीहरूको आत्मसम्मानमाथि हमला हुने कुनै पनि अभिव्यक्ति वा गतिविधिको विरुद्धमा सदैव खबरदारी गर्ने चेतावनी दिँदै युनियनले सबै पक्षलाई संयमता अपनाउन अपिल गरेको छ। विज्ञप्तिमा भविष्यमा यस्तो घटना नदोहोऱ्याउने प्रतिबद्धता अपेक्षित गरिएको छ। युनियनले सम्बद्ध पक्षबाट स्पष्टिकरणसहित क्षमायाचनाको माग गर्दै आन्दोलन र संवाद दुबै शान्तिपूर्ण र मर्यादित ढंगले अघि बढाउनुपर्ने उल्लेख गरेको छ।