गृहमन्त्री लेखकको चेतावनी: ‘ड्रग्स, सडक दुर्घटना र आत्महत्या डरलाग्दो बनिसके, नियन्त्रणमा लाग्नुस्’

गृहमन्त्री रमेश लेखकले देशभर फैलिरहेको लागुऔषधको समस्यालाई डरलाग्दो भन्दै यसको नियन्त्रणका लागि सुरक्षा निकायलाई कडाइका साथ लाग्न निर्देशन दिएका छन्।शुक्रबार जनकपुरमा आयोजित मधेस प्रदेशस्तरीय सुरक्षा गोष्ठीमा बोल्दै गृहमन्त्री लेखकले भने, “ड्रग्सको धेरै ठूलो समस्या छ। देशभर नै लागुऔषधको समस्या देखिएको छ, यसको नियन्त्रण जरुरी छ।

उनले लागुऔषधसँगै सडक दुर्घटना, आत्महत्या र साइबर अपराधलाई पनि गम्भीर समस्याका रूपमा औँल्याए। उनका अनुसार एक दिनमा झन्डै ७ जनाको ज्यान सडक दुर्घटनाबाट जान्छ भने आत्महत्याबाट १७ जनाको मृत्यु भइरहेको छ।

गृहमन्त्री लेखकले यी सबै समस्या आपसमा गाँसिएका रहेको बताए। उनले भने, “मानिसले लागुऔषध सेवन गरेर सवारी चलाउँछ, जसले दुर्घटना निम्त्याउँछ। त्यही लागुऔषधले मानसिक अवस्था बिगार्छ, जसले आत्महत्यासम्म डोर्याउँछ।कार्यक्रममा गृहमन्त्रीले प्रदेशका सुरक्षाकर्मीलाई लागुऔषध नियन्त्रणको अभियानमा समर्पित भएर खटिन आग्रह गरे।