आज सिथि नखः पर्व मनाउँदै, नेवार समुदाय ।

भक्तपुर-आज नेवार समुदायले सिथि नखः पर्व मनाउँदै छन् । जेष्ठ शुक्ल पक्ष षष्ठी अर्थात् कुमार षष्ठीका दिन मनाउने यो पर्वमा नेवार समुदायले पानीका मुहान, इनार, कुवा, पोखरी, धारा सरसफाइ गरेर यो पर्व मनाउदै आएको छन् । हिँउदमा पुरिएको, थुनिएको र सुकेको मूललाई वर्षातको पानीले फुटाउने भएकाले पनि सिथि नखःको दिन पानीको मूलको सफाइ गर्ने गरिएको छ ।

मनसुन भित्रिएपछि पर्ने पानी अर्थात् बर्खामा बगेर आउने भेल र फोहरपानी खानेपानीको मुहानमा मिसिएर पानी दूषित नहोस् भनी पानीको मुहान र स्रोतको वरिपरि सरसफाइ गरी निकास खोल्नु यो पर्वको मुख्य विशेषता समेत रहेको छ । साथै आजको दिन मास, मुगी, केराउ लगायतका दलहनबाट बनेको विशेष प्रकारको ‘बारा’ तथा नयाँ गहुँको रोटी खाने चलन रहेको छ ।