भक्तपुरमा पहिलोपटक ‘फिसटनेल एक्सपो २०८२’ — पानीमुनि टनेलमा रंगीचंगी माछा हेर्ने अवसर !

भक्तपुर- जिल्लामा पहिलोपटक ‘फिसटनेल एक्सपो २०८२’ हुने भएको छ ।जेठ २९ देखि साउन १० सम्म आयोजना हुन लागेको ‘फिसटनेल एक्सपो २०८२’ मा सम्पूर्ण परिवारलाई लक्षित गरेर विभिन्न जलजीव अवलोकन र साहसिक खेलकुद प्रस्तुत गरिने आयोजक औद्योगिक शान्ति नेपाल संस्थाले उज्यालो समाचारलाई जानकारी दिएको छ ।

राधेराधे, भाटभाटिनी पछाडि रोयल थाइसँगैको चौरमा निःशुल्क प्रवेशमा हुन गईरहेको यस मेलामा पहिलोपटक सिंगापुर शैलीको एसी अण्डरवाटर टनेल विश्वभरका रंगीचंगी माछाहरू प्रत्यक्ष नियाल्न र सुनामी थ्री–सिक्स्टी भाइल पिङमा मज्जा लिन सकिनेछ ।

औद्योगिक शान्ति नेपाल संस्थाका अध्यक्ष सन्दिप महत भन्छन्, “हामीले यो कार्यक्रममार्फत नेपाली दर्शकलाई अन्तर्राष्ट्रिय स्तरकै अनुभव दिलाउने लक्ष्य राखेका छौं । साथै भक्तपुरको स्थानीय पर्यटन प्रवद्र्वन गर्दै यहाँका व्यवसायीहरूलाई समेत सशक्त बनाउने हाम्रो विश्वास छ ।”

महत भन्छन् , मुख्य आकर्षणमध्ये एउटा सिंगापुरे एसी अण्डरवाटर फिसटनेल पर्छ, जहाँ आगन्तुकपनि पारदर्शी सुरुङभित्र प्रवेश गरेर २०–३० फिट गहिराइका माछा, कोरल र अन्य जलचर प्रजातिका अवलोकन गर्न पाइन्छ । सुनामी थ्री–सिक्स्टी जुन भाइल पिङ हो, त्यसमा चढ्दा झूला ३६० डिग्री घुमेर साहसिक अनुभव प्रदान हुन्छ । त्यस्तै, मेलामा बालमैत्री गेम जोन, फुड स्टल, फोटो स्पट र सवारी साधन समेत उपलब्ध हुनेछन् ।