चितवनमा ३९ डिग्री तापक्रम! जनजीवन अस्तव्यस्त ‘‘हिट स्ट्रोक’बाट बिरामी पर्न थाले

चितवनमा चर्को गर्मीका कारण जनजीवन प्रभावित बनेको छ। लगातार ३८–३९ डिग्री सेल्सियस तापक्रमले वृद्ध, बालबालिका र बाहिर काम गर्ने श्रमिकहरू बढी प्रभावित छन्। गर्मीका कारण केही स्थानीय तहले विद्यालय बन्द गरेका छन् भने दिउँसो सडक र बजार सुनसान देखिन्छ।

भरतपुरको चौबिसकोठीमा मकै बेच्ने चन्द्रकुमारी पुनमगर भन्छिन्, “घाम र आगोको बीचमा दिन बित्छ, शरीर थाकेर गाह्रो हुन्छ। ग्राहक नै हराएजस्तो छन्।”अटो चालक खलबहादुर मगरको भोगाइ पनि उस्तै छः “सडकको रापले काम गर्नै सकिन्न, तर काम नगरी बस्न मिल्दैन।”

यस्तै त्रिचोकतर्फ हिँडिरहेका भगवान् शाहीले भने, “गर्मीले समयमै काममा पुग्नै गाह्रो भएको छ। पसिना निथ्रुक्क भएर कपडा फेर्नुपर्ने अवस्था छ।”भरतपुर अस्पतालका फिजिसियन डा. गोविन्द कँडेलका अनुसार गर्मीका कारण ’हिट स्ट्रोक’का बिरामी बढेका छन्। “दुई जनामा हिट स्ट्रोक पुष्टि भइसकेको छ,” उनले बताए। एक जना भेन्टिलेटरमा पुगेपछि निको भएर फर्केका छन्।

डा. कँडेल भन्छन्, “गर्मीमा पसिना नआएर शरीरको तापक्रम बढ्ने समस्या हुन्छ, जुन गम्भीर ’हिट स्ट्रोक’मा परिणत हुन सक्छ।” साथै, गर्मीमा दम, छातीका रोग र टाइफाइड, ज्वरोजस्ता संक्रमण पनि बढ्ने खतरा रहेको छ।

मौसमविद् रोजन लामिछानेका अनुसार, चितवनमा ‘फिल लाइक टेम्परेचर’ अर्थात् महसुस हुने तापक्रम उच्च भएकाले मानिसलाई अझ गर्मी लाग्ने गर्छ। “आज रातिबाट वर्षाको सम्भावना देखिएको छ, तापक्रम केही घट्न सक्छ,” उनले जानकारी दिए।

रासस