रवि लामिछाने जेलमै, फेरि ठगी मुद्दा ५ करोड बढी बिगो दाबी ।

सहकारीको रकम हिनामिना गरेको आरोपमा रास्वपा सभापति रवि लामिछानेविरुद्ध आज पर्सा जिल्ला अदालतमा मुद्दा दर्ता भएको छ।वीरगन्जस्थित सानो पाइला बचत तथा ऋण सहकारी संस्थाको रकम अपचलनको अभियोगमा लामिछानेसहित २९ जनाविरुद्ध मुद्दा दर्ता भएको हो।

लामिछानेविरुद्ध सानो पाइला सहकारी ठगी प्रकरणमा ५ करोड ७४ लाख ३० हजार ३३३ रुपैयाँ बिगो माग दाबी भएको छ। यो मुद्दामा लामिछानेसँगै छविलाल जोशी, प्रमोद भट्टराई र रामबहादुर खनाल थुनामा छन् भने अन्य २५ जना फरार छन्।

लामिछाने हाल रूपन्देही कारागारमा जेल जीवन बिताइरहेका छन्। केही दिनअघि उनी कारागार सरुवा भई काठमाडौँ सारिने चर्चा थियो। प्रहरीले अनुसन्धान सकेर करिब १ महिनाअघि सरकारी वकिल कार्यालय पर्सालाई प्रतिवेदन बुझाएको थियो। त्यसैका आधारमा सरकारी वकिलको कार्यालयले अध्ययनपछि लामिछानेसहित २९ जनाविरुद्ध जिल्ला अदालतमा १०१ पेजको पूरक अभियोगपत्र दर्ता गरेको हो।