कारागार चलानको दोस्रो दिनमै कैदीको रहस्यमय मृत्यु, प्रदर्शनपछि छानबिन समिति गठन ।

भक्तपुर-कैलाली जिल्ला कारागारको थुनामा रहेका कैदीबन्दीको मृत्युबारे अनुसन्धानका लागि छानबिन समिति गठन गरिएको छ।कैलाली जिल्ला प्रशासन कार्यालयले सहायक प्रमुख जिल्ला अधिकारी (सीडीओ) किरण जोशीको अध्यक्षतामा बुधबार छानबिन समिति गठन गरेको हो।

सोमबार डडेल्धुराको भागेश्वर गाउँपालिका वडा नम्बर ५ का २८ वर्षीय हरिश सिंह पालीको सेती प्रादेशिक अस्पताल धनगढीमा उपचारको क्रममा मृत्यु भएको थियो।उनी बैङ्किङ कसुरमा दोषी ठहर भई कारागारमा चलान भएका थिए। कारागार चलान भएकै दिन असार २ गते बिहान अचानक बिरामी परेपछि उपचारका लागि अस्पताल लगिएको थियो।

तर, उपचारकै क्रममा उनको मृत्यु थियो। कारागार चलान भएको दोस्रो दिनमै मृत्यु हुनु शङ्कास्पद रहेको भन्दै मृतक आफन्तले घटनाको छानबिन गर्न माग गर्दै आज दिनभर डडेल्धुरा बजार बन्द तथा राजमार्ग अवरुद्ध गरेका थिए । छानबिन समिति गठनपछि अवरुद्ध राजमार्ग सुचारु भइसकेको छ ।