कर्मचारीदेखि जनप्रतिनिधिका छोराछोरी सरकारी स्कुलमा, बेरोजगारका लागि रोजगार सीप मेला : पुर्वीचौकीको नीति

डोटी -जिल्लाको पुर्वीचौकी गाउँपालिकाले आर्थिक वर्ष २०८२/०८३ का लागि नीति तथा कार्यक्रम सार्वजनिक गरेको छ। जनप्रतिनिधि र सरकारी कर्मचारीका छोराछोरीलाई सामुदायिक विद्यालयमै अनिवार्य पठनपाठन गराउने र बेरोजगार युवायुवतीका लागि रोजगार सिप मेला सञ्चालन पालिकाद्वारा सञ्चालित बस सेवामा यात्रुको सहजताको लागि ई–टिकट प्रणाली लागू गर्ने नीति अघि सारिएको हो।

गाउँपालिकाले “गाउँमै कमाउने, गाउँमै रमाउने” भन्ने मूल नारा अघि सार्दै स्थानीय स्रोत र कच्चा पदार्थमा आधारित साना उद्योग प्रवद्र्धन गर्ने नीति प्रस्तुत गरेको हो ।पालिका अध्यक्ष रामप्रसाद उपाध्यायले गाउँपालिकाको १७ औँ गाउँसभामा नीति तथा कार्यक्रम प्रस्तुत गर्दै स्थानीय स्रोत साधनको अधिकतम उपयोगमार्फत स्वरोजगारको वातावरण सिर्जना गरिने बताउनु भयो ।

उपाध्यायका अनुसार बाँस, निगालो, अल्लो, भिमल, लोतो, लगाएतका कच्चा पदार्थ प्रयोग गरेर साना उद्योगहरू स्थापना गरिने छन्। साथै, बेमौसमी तरकारी खेती, फलफूल तथा जडीबुटी खेती, पशुपालन लगायत कृषि तथा वनजन्य आयमुखी कार्यक्रमहरूलाई प्राथमिकता दिइने जानकारी दिएका हुन् ।
गाउँपालिकाको १७ औँ गाउँ सभाबाट आ.ब. २०८२/०८३ का लागी एकाउन्न करोड उनासत्तरी लाख अठासी हजार सात सय पच्चिस रुपैयाँ बराबरको नीति तथा कार्यक्रम पालिका उपाध्यक्ष पशुपति खड्काले प्रस्तुत गर्नु भएको थियो ।