आनन्द बस्तीमा एसईईमा उत्कृष्ट नतिजा ल्याउने विद्यार्थीहरू सम्मानित ।

भक्तपुर, असार १६ –आनन्द बस्तीमा एसईईमा उत्कृष्ट नतिजा ल्याउने विद्यार्थीहरू सम्मानित भएका छन् । सुर्यविनायक नगरपालिका–८ सिपाडोल इटबु हाईटस्थित आनन्द बस्ती टोल सुधार समितिले २०८१ सालको माध्यमिक शिक्षा परीक्षा (एसईई) मा उत्कृष्ट नतिजा ल्याउने विद्यार्थीहरूलाई विशेष कार्यक्रममार्फत बधाई तथा सम्मान गरेको छ।

आईतबार समितिकी अध्यक्ष शुशिला लामिछानेको संयोजकत्वमा आयोजित उक्त कार्यक्रममा बस्तीका ज्येष्ठ नागरिक, समाजसेवी, बुद्धिजीवी, शिक्षक, पत्रकार लगायतको उपस्थिति रहेको थियो। कार्यक्रममा ८ जना उत्कृष्ट विद्यार्थीहरूलाई पुष्पगुच्छा अर्पण गर्दै बधाई तथा सम्मान गरिएको हो।

कार्यक्रममा अध्यक्ष लामिछानेले विद्यार्थीहरूले टोल सुधारको दिशामा गर्व गर्न लायकको इतिहास रचेको बताउँदै, “यो सम्मान कार्यक्रमले टोलमा आपसी भाइचारा, स्नेह, आत्मीयता र बाल्यकालको स्मरण समेत गराएको छ,” भन्नुभयो। साथै उहाँले अभिभावकहरूलाई सामूहिक रूपमा अघि बढ्न प्रेरणा मिल्ने विश्वास व्यक्त गर्दै विद्यार्थीहरूको उज्जवल भविष्यको कामना गर्नुभयो।