लिफ्ट बनाउने क्रममा घरको चौथो तलाबाट खसेर २ जना कामदारको मृत्यु ।

भक्तपुर – निर्माणधीन घरको चौथो तलाबाट खसेर दुई जना कामदारको मृत्यु भएको छ । काठमाण्डौको दरबारमार्गमा लिफ्ट बनाउने क्रममा कैलाली घर भएका अन्दाजी ३० वर्षका प्रदेशी चौधरी र बर्दिया घर भएका अन्दाजी २० वर्षका विशाल चौधरी रहेको जिल्ला प्रहरी परिसर काठमाण्डौका प्रवक्ता एसपी अपील राज बोहराले जानकारी दिनुभयो ।

हिजो साझ ५ बजेको समयमा दरबारमार्गमा रहेको हिटीपोखरी नजिक पोतला डेभलप्मेन्ट प्रालिले बनाउँदै गरेको नौ तले पक्की घरको चौथो तलाबाट उनीहरू खसेका हुन् । लिफ्टमा ग्रिज लगाउन भन्दै चढेका उनीहरू फलामको सिक्री चुँडिएर भुँईमा खसेका थिए । तत्कालै उद्धार गरी वीर अस्पताल लगिएकामा उपचारका क्रममा दुवैजनाको ज्यान गएको प्रहरीले जनाएको छ ।