रसुवा बाढीले बेपता भएका १८ जनाको खोजी कार्य जारी,सतर्कता अपनाउन आग्रह ।

भक्तपुर – नेपाल–चीनको सिमानामा रहेको ल्हेन्दे खोलामा आज बिहान ३ बजेतिर आएको बाढीले बेपता भएका १८ जनाको खोजी भइरहेको छ ।
हराउनेमा छ जना नेपाली कामदार, छ जना चिनियाँ कामदार, तीन जना प्रहरी र तीन जना गाडी चालक रहेका जिल्ला प्रशासन कार्यालय रसुवाले जनाएको छ । बाढीले नेपाल–चीन नाका जोड्ने मितेरी पुल बगाएर पूर्ण रूपमा क्षति पुगेको छ ।

प्रहरीका अनुसार विद्युतीय गाडी चार्जिङ स्टेशनमा क्षति पुगेको र आठ वटा विद्युतीय गाडी बगाएको छ । यसैगरी रसुवागढी हाड्रोपावरमा समेत क्षति पुगेको छ । एकजना नेपाल प्रहरी र एकजना सशस्त्र प्रहरीका जवान तथा सात जना स्थानीयबासिन्दाको भने सकुशल उद्धार गरिएको जिल्ला प्रशासन कार्यालय रसुवाले जनाएकोे छ । गृह मन्त्रालयका अनुसार खोज तथा उद्धारको लागि हेलिकोप्टर परिचालन गरिएको छ । गोसाइकुण्ड गाउँपालिकामा पर्ने पासाङल्हामु सडकखण्डको धुन्चेदेखि टिमुरेसम्मको बाटो बाढीका कारण बन्द भएको रसुवा प्रहरीले जनाएको छ ।

रसुवामा आएको बाढीले त्रिशूली नदीको बहाव बढ्दा त्यसको प्रभाव नुवाकोट र धादिङसम्म पुगेको छ । बिहान नुवाकोटको विदुर नगरपालिकामा त्रिशूली नदीमा फसेका दुई जनालाई नेपाली सेनाको हेलिकोप्टरले सकुशल उद्धार गरेको छ । त्रिशूलीमा बाढी आउँदा त्यसको प्रभाव नारायणी नदीमा पनि देखिएको छ । बाढी पूर्वानुमान महाशाखाका अनुसार तिब्बत क्षेत्रमा परेको वर्षाले ल्हेन्दे खोला, भोटेकोशी हुँदै त्रिशूली नदीसम्म बाढी आएको हो । महाशाखाका अनुसार तिब्बत क्षेत्रमा परेको वर्षाले ल्हेन्दे खोला, भोटेकोशी हुँदै त्रिशूली नदीसम्म बाढी आएको हो ।