खहरे खोलाको लेदाले बीपी राजमार्गको सडक अवरुद्ध।

भक्तपुर – बीपी राजमार्गमा हिजो राति परेको पानीले राजमार्गमा तीन ठाउँमा सडक अवरुद्ध भएको छ । प्रहरीका अनुसार काभ्रेको रोशी गाउँपालिका–११ माम्तीको सडकमा भेलबाढी आई कटान गरी सडक अवरुद्ध भएको हो ।

गएराति अवरुद्ध सडक आज बिहानदेखि खुलाउने प्रयास भइरहेको जिल्ला प्रहरी कार्यालय धुलिखेलले जनाएको छ । यस्तै राजमार्गको रोशी– ९ खहरे खोलाको लेदो आई गएराति सडक अवरुद्ध भएको थियो । बिरुवाडाँडामा खहरे खोलाको लेदो आई सडक अवरुद्ध भएको कार्यालयका सूचना अधिकारी मीनबहादुर घलेले जानकारी दिनुभयो ।

उहाँका अनुसार पालिकाका जनप्रतिनिधिको समन्वयमा सडक खुलाउने प्रयास भइरहेको छ । गएको असार २५ गते पनि मङ्गलटारको बिरुवाडाँडामा सडक अवरुद्ध भएको थियो । राजमार्गकै पिन्थलीमा यसअघि पनि पटक–पटक सडक अवरुद्ध हुँदै आएको थियो ।