अण्डा उत्पादन घट्दा मूल्यमा वृद्धि ।

भक्तपुर  – चाडपर्व शुरू भएसँगै पछिल्ला  दिनमा अण्डाको उत्पादन घटेपछि बजारमा यसको मूल्य बढेको छ ।
कृषकहरूले चारा महँगो हुनु र कुखुरामा देखिएको रोगका कारण उत्पादनमा गिरावट आएको बताएका छन ्। उत्पादन घटेपछि आपूर्ति कम भई मूल्य बढेको व्यापारीहरूको भनाइ छ । नेपाल अण्डा उत्पादक संघका अनुसार हाल दैनिक आपूर्ति सामान्य भन्दा २५–३० प्रतिशतले घटेको छ । यसको प्रत्यक्ष असर खुद्रा मूल्यमा परेको हो ।

अहिले काठमाडौँ उपत्यकामा एक पिस अण्डाको मूल्य १८ देखि २० रुपैयाँमा कारोबार भइरहेको छ, जुन केही हप्ताअघि १५ रुपैयाँसम्ममा पाइन्थ्यो । सङ्घका अध्यक्ष विनोद पोखरेलका अनुसार आजदेखि लागू हुने गरी ठूलो अण्डाको मूल्य प्रतिक्रेट ३० वटाको पाँच सय ४५ रुपैयाँ र मझौला अण्डाको पाँच सय ३० रुपैयाँ कायम गरिएको छ ।

यससँगै खुद्रा बजार मूल्य प्रतिगोटा २३ रुपैयाँ कायम गरिएको छ । नेपालमा अहिले अण्डाको औसत लागत मूल्य प्रतिगोटा १६ रुपैयाँ ५६ पैसा रहेको छ । अहिले लागत मूल्य पाए पनि धेरै किसान विस्थापित भइसकेका छन् । उहाँले अहिले कुखुरा पालिरहेका किसान समेत विगतको नोक्सानका कारण सङ्कटमा रहेको बताउनुभयो । नेपाल अण्डा उत्पादक सङ्घका पूर्व केन्द्रीय अध्यक्ष त्रिलोचन कँडेलले दैनिक ४० लाखभन्दा बढी अण्डा उत्पादन हुने गरेकामा अहिले २२ लाखको हाराहारीमा झरेको जानकारी दिनुभयो ।