बिपी राजमार्गमा भदौ मसान्तसम्म राति सवारीसाधन गुडाउन रोक ।

भक्तपुर – दुर्घटनाको जोखिम बढ्दै गएपछि बिपी राजमार्गमा भदौको मसान्तसम्म राति सवारीसाधन गुडाउन रोक लगाइएको छ । जिल्ला सुरक्षा समिति काभ्रेको हिजोको बैठकले थप १५ दिन गाडी चलाउन रोक लगाएको हो ।

यसअघि गएको असार ७ गतेदेखि राति गाडी चलाउन रोक लगाइँदै आएकोमा भदौ मसान्तसम्म राति १२ घण्टा गाडी चलाउन रोक लगाउने निर्णय भएको सहायक प्रमुख जिल्ला अधिकारी सुदर्शन श्रेष्ठले जानकारी दिनुभयो । बिपी राजमार्गमा हरेक दिन बेलुकी ५ बजेदेखि बिहान ५ बजेसम्म यात्रुवाहक तथा निजी गाडी सञ्चालनमा रोक लगाइने छ ।

बारम्बार हुने दुर्घटना र सडक स्तरोन्नतिको कामका कारण रातिको समयमा सवारी गुडाउन रोक लगाइएको अधिकारीहरूले बताएका छन्। अत्यावश्यक सेवा, एम्बुलेन्स र सुरक्षा निकायका गाडी भने यस निर्णयबाट मुक्त रहने जनाइएको छ । प्रहरीले रातिको समयमा यात्रामा ननिस्कन नागरिकलाई आग्रह गर्दै विहान र दिउँसोको समयमा मात्र यात्रा गर्न सुझाव दिएको छ ।