सूचीबाहिर रहेका सामाजिक सञ्जाल बन्द गर्ने सरकारी निर्णय ।

बबिता परियार
भक्तपुर – नेपाल सरकारले सूचीकृत हुन नआएका सबै सामाजिक सञ्जाल बन्द गर्ने निर्णय गरेको छ । सरकारले सूचना तथा सञ्चार प्रविधि ऐन अन्तर्गत आवश्यक प्रक्रिया पूरा नगरी सञ्चालन भइरहेका सामाजिक सञ्जालले मुलुकमा अव्यवस्था बढाएको भन्दै यस्तो कदम चालिएको हो ।

सञ्चार तथा सूचना प्रविधि मन्त्रालयमा सञ्चारमन्त्री पृथ्वीसुब्बा गुरुङको संयोजकत्वमा आज बसेको बैठकले तोकिएको म्यादभित्र सूचीकरणका लागि सम्पर्कमा समेत नआउने सबै सामाजिक सञ्जालमाथि प्रतिबन्ध लगाउने निर्णय गरेको मन्त्रालयका उपसचिव एवम् सूचना अधिकारी रविन्द्रप्रसाद पौड्यालले जानकारी दिनुभयो ।

निर्णय कार्यान्वयनका लागि दूरसञ्चार प्राधिकरणलाई पत्राचार गरिसकेको उहाँले बताउनुभयो । पछिल्लो पटक दिएको सात दिनको म्याद गएराति सकिएको थियो । म्याद दिएको समयमा कुनै पनि सामाजिक सञ्जाल कम्पनी सम्पर्कमा आएनन् । तर नेपालमा टिकटक, भाइबर, निम्बज, विटक र पोपो लाइभ मात्रै सूचीकृत भएका छन् ।

नेपालमा सञ्चालन हुने प्रत्येक सामाजिक सञ्जालले अनिवार्य रूपमा सरकार समक्ष दर्ता भई सूचीमा समावेश हुनुपर्ने व्यवस्था छ । तर, हालसम्म थुप्रै एप तथा प्लेटफर्मले औपचारिक स्वीकृति नलिई सेवा दिँदै आएका कारण अब ती सञ्जाल बन्द गरिने बताइएको छ ।