जेनजी शहीदको सम्झनामा ‘स्मारक पार्क निर्माण गर्ने निर्णय ।

भक्तपुर-सरकारले जेनजी आन्दोलनमा ज्यान गुमाएका नागरिकहरूको सम्झनामा ‘जेनजी जागरण स्मारक पार्क’ निर्माण गर्ने निर्णय गरेको छ।सोमबार बसेको मन्त्रिपरिषद बैठकले स्मारक पार्क निर्माण गर्ने निर्णय गरेको गृह तथा कानुनमन्त्री ओमप्रकाश अर्यालले जानकारी दिएका छन्।

“जेनजी आन्दोलनका क्रममा ज्यान गुमाएकाहरूको बलिदानलाई सम्मान गर्ने उद्देश्यले सरकारले स्मारक पार्क निर्माण गर्ने निर्णय गरेको हो,” मन्त्री अर्यालले बताए।उनका अनुसार पार्क निर्माणको स्थान अझै तोकिएको छैन। मन्त्रालयले सरोकारवाला निकायसँग छलफल गरी उपयुक्त स्थान छनोट गर्ने प्रक्रिया अघि बढाउने तयारी गरेको छ।

सरकारले स्मारक पार्कलाई राष्ट्रिय महत्वको स्मारकका रूपमा विकास गर्ने बताइएको छ। मन्त्री अर्यालका अनुसार पार्कमा जेनजी आन्दोलनको ऐतिहासिक महत्त्व उजागर हुने गरी स्मारक संरचना, शहीदको नामावली अंकित स्मृति–स्तम्भ र अध्ययन–अनुसन्धानका लागि पनि स्थल रहनेछ।

आन्दोलनमा प्रदर्शनकारी ५९ जना, कैदीबन्दी १० जना र सुरक्षाकर्मी ३ जना गरी ७२ जनाको ज्यान गएको सरकारको तथ्याङ्कमा उल्लेख छ। १३४ जना प्रदर्शनकारी र ५७ जना प्रहरी घाइते भएका छन् ।भ्रष्टाचार र सामाजिक सञ्जालमाथि लगाइएको प्रतिबन्धविरुद्ध भदौ २३ गते युवाहरु आन्दोलनमा उत्रिएका बेला प्रहरीसँग झडप भएको थियो । त्यसक्रममा विभिन्न ठाउँमा आगजनी हुँदा पनि विभिन्न व्यक्तिहरुको मृत्यु भएको छ ।मृतक सबैको सनाखत हुन सकेको छैन । जलेका ठाउँहरु सफा गर्ने क्रममा शव भेटिने क्रम जारी छ