म बनाउँछु मेरो सिंहदरबार, म बनाउँछु मेरो देश अर्घाखाँचीका एक किसानले गरे,१ लाख १ सय रुपैयाँ सहयोग ।

भक्तपुर -‘ म बनाउँछु मेरो सिंहदरबार, म बनाउँछु मेरो देश’ भन्दै जलेको सिंहदरबार बनाउन अर्घाखाँचीका किसान तुलसीरामले एक लाख रुपैयाँ सहयोग गरेका छन् । अर्घाखाँचीको शितगङ्गा नगरपालिका–२ का किसान अधिकारीले सिंहदरबार बनाउन सहयोग कोषमा १ लाख १ सय रुपैयाँ जम्मा गर्नुभएको हो ।

आफूले व्यावसायिक खेतीबाट कमाएको आम्दानी कोषमा जम्मा गरेको उहाँले बताउनुभयो । अर्घाखाँचीका प्रमुख जिल्ला अधिकारी गोपालप्रसाद अर्यालले सहयोगप्रति धन्यवाद व्यक्त गर्दै यसैगरी प्राप्त सहयोगबाट अबको पुनर्निर्माणमा टेवा पुग्ने बताउनुभयो ।

रकम जम्मापछि किसान अधिकारीले भौचर प्रमुख जिल्ला अधिकारीलाई हस्तान्तरण गर्नुभएको थियो । भदौ २४ गतेको जेन–जी प्रदर्शनका क्रममा मुख्य प्रशासनिक निकाय सिंहदरबारसहित अन्य धेरै महत्त्वपूर्ण निकायको भवन तथा संरचना आगजनीबाट क्षति भएको छ ।