देश रोएको बेला बालेन हाँस्दै बसेको आरोप हर्क साम्पाङको ?

भक्तपुर- धरान उपमहानगरपालिकाका मेयर हर्क साम्पाङले काठमाडौँ महानगरका मेयर बालेन शाहमाथि फेरि कडा प्रहार गरेका छन्। देश शोकमा डुबेको बेला बालेन संवेदनशील नबनेको भन्दै साम्पाङले सामाजिक सञ्जालमार्फत प्रश्न उठाएका हुन्।

साम्पाङले मंगलबार अपराह्न फेसबुकमा लेखेका छन्, “लुकेर गेम खेल्दै स्टाटस लेख्न सजिलो छ। देशले कति गुमायो थाहा छ? देश रोएको बेला ऊ (बालेन) हाँस्दै बसेको छ।”यसअघि बालेनले साम्पाङप्रति नरम स्वर अपनाउँदै फेसबुकमै “डियर हर्क साम्पाङ, तिमीले मलाई जति गाली गरे पनि म तिमीलाई माया गर्न छोड्दिन।

एकतर्फी नै सही, तर मेरो माया साँचो हो” भन्दै प्रतिक्रिया दिएका थिए। बालेनको उक्त शैलीले साम्पाङलाई फकाउन खोजिएको ठानिए पनि हर्क अझै आक्रोशित देखिएका छन्।साम्पाङले बालेनमाथि अघिल्ला दिनहरूमा पनि प्रहार गरेका थिए। जेनजी आन्दोलनपछि बालेन सक्रिय नभएको भन्दै उनले खुलेरै आलोचना गरेका थिए।

यस पटकको टिप्पणीले फेरि दुई लोकप्रिय मेयरबीचको सामाजिक सञ्जाल–युद्धलाई सार्वजनिक विमर्शमा ल्याएको छ। एकातर्फ बालेनले हर्कलाई माया गर्ने भाषा प्रयोग गरिरहेका छन् भने अर्कोतर्फ साम्पाङ देशको पीडा बेवास्ता गरिएको आरोपसहित कडा आलोचनामा उत्रिएका छन्।