पार्टी बैठकमा तनाबः प्रचण्डको प्रस्तावप्रति वरिष्ठ नेताहरूको असहमति ।

निर्देशक समितिमा बसेर नयाँ पुस्तालाई नेतृत्व हस्तान्तरण गर्ने जनार्दन शमाको भनाई ।

असोज, ९ भक्तपुर । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले पार्टी बैठकमा प्रस्तुत गरेको प्रस्तावप्रति वरिष्ठ नेता नारायणकाजी श्रेष्ठ र उपमहासचिव जनार्दन शर्मा असहमत भएका छन । सुरुमा बोलेका अध्यक्ष प्रचण्डले आगामी मंसिरमा विशेष महाधिवेशन गर्ने प्रस्ताव प्रस्तुत गरेका छन् । विशेष महाधिवेशनमा जाने भएपछि पदाधिकारी र केन्द्रीय समिति भंगको प्रस्ताव प्रस्तुत गरेका थिए । त्यसमा असहमति जनाउँदै उपमहासचिव शर्माले नयाँ प्रस्ताव राखेका छन् । आफ्नो असहमति रहेको भन्दै उनले नयाँ प्रस्ताव राखेका हुन् । उपमहासचिव शर्माले भनेका छन्, ‘सबै पदाधिकारी राजीनामा दिएर निर्देशक समितिमा बसेर नयाँ पुस्तामा नेतृत्व हस्तान्तरण गरौं ।’

नारायणकाजीले पार्टीलाई सामूहिक नेतृत्वतर्फ लैजानुपर्नेमा जोड दिँदै प्रचण्डको प्रस्ताव व्यक्ति केन्द्रित भएको टिप्पणी गरेका छन । त्यस्तै, जनार्दनले आर्थिक नीतिमा प्रचण्डले ल्याउन खोजेको खाकालाई व्यवहारिक विकल्प नभएको भन्दै संशोधन गर्नुपर्ने माग गरेका छन्। पार्टी बैठकमा अन्य नेताहरूले पनि विभिन्न सुझाव र आलोचना प्रस्तुत गरेका छन्। प्रचण्डले भने असहमति र सुझावलाई समेटेर पुनः परिमार्जनसहित प्रस्ताव अघि बढाइने बताएका छन्।

भदौ २३ र २४ गते भएको जेनजीको प्रदर्शनपछि तत्कालीन प्रधानमन्त्री केपी शर्मा ओलीले राजीनामा दिए । त्यसपछि प्रतिनिधि सभाबाट अर्को सरकार बन्ने वातावरण नरहेको भनेर पूर्व प्रधानन्यायाधीश सुशीला कार्कीको नेतृत्वमा अन्तरिम सरकार बनेको छ । अन्तरिम सरकारको सिफारिसमा राष्ट्रपति रामचन्द्र पौडेलले प्रतिनिधि सभा विघटन गरेर आगामी फागुन २१ गतेका लागि चुनावको मिति तोकेका छन् । उक्त चुनाव समयमै सम्पन्न गराउन पार्टीले भूमिका खेल्नुपर्ने र पार्टीको महाधिवेशन चुनाव पछाडि गर्नुपर्ने श्रेष्ठको प्रस्ताव रहेको छ ।