बाजुराको मार्तडीमा भीषण आगलागी, फर्निचर पसल र ग्यारेज जलेर नष्ट

तिर्थ नेपाली,
काठमाडौं
बाजुरा जिल्लाको सदरमुकाम मार्तडी बजारमा आज दिउँसो भीषण आगलागी भएको छ। बडिमालिका नगरपालिका–८ मार्तडी बजारमा रहेको स्थानीय प्रकाश थापाले सञ्चालन गर्दै आएका सागर फर्निचर तथा नजिकै रहेको एक ग्यारेजमा अचानक आगो लाग्दा दुवै व्यवसाय पूरै जलेर नष्ट भएको प्रहरीले जनाएको छ।
आगो लागेपछि जिल्ला प्रहरी कार्यालय बाजुराबाट खटिएको टोली घटनास्थलमा पुगेर स्थानीयको सहयोगमा आगो नियन्त्रणमा लिने प्रयास गरे पनि दमकल नहुँदा आगो निभाउन कठिनाई भएको बताइएको छ।जिल्ला प्रहरी कार्यालय बाजुराका प्रहरी सहायक निरीक्षक लक्ष्मीदत्त जोशीका अनुसार प्रारम्भिक अनुसन्धानमा विद्युत् सर्ट भएर आगलागी भएको हुनसक्ने आशंका गरिएको छ। उनले उज्यालोसमाचार डटकमसँग कुरा गर्दै भने,
“विद्युत् तार सर्ट भएर आगो लागेको हुनसक्ने देखिन्छ, विस्तृत अनुसन्धान भइरहेको छ।”

त्यस्तै, जिल्ला प्रहरी कार्यालय मार्तडीका सूचना अधिकारी लक्ष्मीराज जोशीले दिउँसो करिब १२ः४० बजे आगो लागेको जानकारी प्राप्त भएको बताए।आगलागीबाट भएको धनजनको क्षति विवरण संकलन भइरहेको र वास्तविक कारण भने अझै सार्वजनिक हुन बाँकी रहेको प्रहरीको भनाइ छ।