तेस्रो पटक पनि नेकपा एमालेको अध्यक्षमा केपी शर्मा ओली विजयी ।

भक्तपुर – नेकपा एमालेको अध्यक्ष पदमा केपी शर्मा ओली तेस्रो पटक निर्वाचित हुनुभएको छ । ओलीले १ हजार ६६३ मत र अध्यक्षका अर्का उम्मेदवार ईश्वर पोखरेलले ५ सय ६४ मत प्राप्त गर्नुभएको छ । अध्यक्ष पदका लागि भएको निर्वाचनमा ओलीले प्रतिस्पर्धीलाई पछि पार्दै निर्णायक विजय हासिल गर्नुभयो ।

पार्टीभित्र संगठन सुदृढीकरण, राजनीतिक स्थायित्व र आगामी निर्वाचनमा एमालेको भूमिकालाई अझ प्रभावकारी बनाउने आफ्नो प्रतिबद्धता उहाँले व्यक्त गर्नुभयो । नव–निर्वाचित अध्यक्ष ओलीले महाधिवेशन प्रतिनिधिहरूलाई धन्यवाद दिँदै पार्टीलाई एकताबद्ध बनाएर अघि बढ्ने बताउनुभयो । उहाँले एमाले देशको समृद्धि, सुशासन र राष्ट्रिय स्वाधीनताका पक्षमा दृढतापूर्वक उभिने स्पष्ट गर्नुभयो ।

तेस्रो कार्यकालसँगै ओलीको नेतृत्वमा नेकपा एमाले ले आगामी दिनमा राजनीतिक एजेन्डा र संगठनात्मक रणनीति कसरी अघि बढाउँछ भन्ने विषय चासोको केन्द्र बनेको छ । पूर्वमहा सचिवसमेत रहनुभएका ईश्वर पोखरेलले भने अध्यक्ष पदका लागि पहिलो पटक प्रतिस्पर्धा गर्नुभएको हो ।