पद्म पब्लिक मुक्तिनारायण विद्यालय बाट एसइइ टपर कञ्चन लाई ‘डा. हेमराज जोशी स्मृति पुरस्कार’

भक्तपुर-गत वर्ष २०८१ सालको माध्यमिक शिक्षा परीक्षा एसइइमा डोटी जिल्लाकै सर्वोत्कृष्ट नतिजा हासिल गरेकी छात्रा कञ्चन पालीलाई ‘डा. हेमराज जोशी स्मृति पुरस्कार’ प्रदान गरिएको छ।

सदरमुकाम सिलगढीस्थित पद्म पब्लिक मुक्तिनारायण माध्यमिक विद्यालयको ७८औँ वार्षिकोत्सवको अवसरमा शुक्रबार पालीलाई उक्त पुरस्कार प्रदान गरिएको हो। उनी हाल उच्च शिक्षा अध्ययनका लागि जिल्ला बाहिर रहेकाले उनका बुबा झलक पालीले पुरस्कार तथा सम्मान ग्रहण गरेका छन्।

विद्यालयका निवर्तमान विद्यालय व्यवस्थापन समिति अध्यक्ष रामचन्द्र भट्ट र प्रधानाध्यापक केशवराज ओझाले संयुक्त रूपमा पालीका बुबा लाई नगद, दोसल्ला र सम्मानपत्र हस्तान्तरण गरेका हुन्।

डा. हेमराज जोशी स्मृति पुरस्कार’ अन्तर्गत नगद १० हजार रुपैयाँ प्रदान गरिएको छ। जसमा ५ हजार रुपैयाँ पुरस्कार कोषबाट र ५ हजार रुपैयाँ विद्यालयको तर्फबाट प्रदान गरिएको हो।

दिपायल सिलगढी नगरपालिका–६ निवासी स्वर्गीय डा। हेमराज जोशीको स्मृतिमा करिब दुई दशकअघि स्थापना गरिएको उक्त पुरस्कार एसइइमा उत्कृष्ट नतिजा ल्याउने विद्यार्थीलाई प्रत्येक वर्ष प्रदान गरिँदै आएको छ।

स्वर्गीय जोशी नेपालका तत्कालीन क्षयरोग विशेषज्ञ चिकित्सक रहेको दिपायल सिलगढी नगरपालिकाका पूर्व मेयर पूर्णराज जोशीले जानकारी दिए।छात्रा पालीले एसइइमा ३.९६ जीपीए प्राप्त गर्दै डोटी जिल्लाकै इतिहासमा सर्वोत्कृष्ट नतिजा ल्याउन सफल भएकी थिइन्। हाल उनी काठमाडौँ मोडल कलेज, बागबजारमा प्लस टु साइन्स अध्ययनरत छन्।