मेरो कारण डोटेली जनताको शिर झुक्न दिने छैन् : भरत खड्का

तिर्थ नेपाली

काठमाण्डौ – नेपाली कांग्रेसका डोटी प्रतिनिधिसभा सदस्य पदका उम्मेदवार भरत खड्काले आफ्‌नो कारणले डोटेली जनता र डोटी जिल्लाको प्रतिष्ठामा कहिल्यै आँच नआउने स्पष्ट पारेका छन्।बुधवार डोटीमा आयोजित पत्रकार सम्मेलनमा बोल्दै खड्काले डोटीको सम्मान, पहिचान र अधिकारको सवालमा आफू कहिल्यै सम्झौता नगर्ने बताएका हुन्। डोटीमा राजधानी फर्काउने विषयमा उठ्ने बहस प्रति टिप्पणी गर्दै उनले भने, “डोटीमा राजधानी ल्याउँछु भनेर आश्वासन दिनु यथार्थ होइन। म त्यो विषयमा इमान्दार थिएँ। प्रयास गरेँ, अडान लिएँ, तर सफल हुन सकिन। अन्ततः एक्लो बृहस्पति बन्नुर्पयो।”

पञ्चायतकालदेखि डोटी जिल्‌लाको राजनीति र विकासमा सक्रिय रहँदै आएका खड्काले आफू सधैं जिल्लाको समग्र विकासका लागि उभिएको दाबी गरे। उनले अनुभव, निरन्तरता र जिम्मेवार नेतृत्व नै डोटीको आवश्यकता भएको बताए।वैकल्पिक राजनीतिक दल र युवा नेतृत्वबारे पत्रकारको जिज्ञासामा खड्काले संविधानले दिएको अधिकारअनुसार नयाँ दल र नेतृत्व आउनु सकारात्मक भएको उल्‌लेख गरे। तर, “युवा हुनु मात्र पर्याप्त हुँदैन,” उनले भने, “राजनीतिमा सोच, स्पष्ट भिजन र अनुभव पनि उत्तिकै आवश्यक हुन्छ।”

खड्काले लोकतन्त्र भोकमरी, अराजकता र अस्थिरतासँग टिक्न नसक्ने धारणा राख्दै राजनीतिक स्थायित्व, सुशासन र जनउत्तरदायी नेतृत्व अपरिहार्य भएको बताए।डोटेली जनताको अभिमतलाई सधैं सम्मान गर्दै आएको उल्‌लेख गर्दै खड्काले यसपटकको प्रतिनिधिसभा निर्वाचनमा पनि आफ्‌नो जित सुनिश्चित हुनेमा आफू विश्वस्त रहेको बताए।

पञ्चायतकालदेखि राजनीतिमा सक्रिय भरत खड्का २०७४ सालमा सुदूरपश्चिम प्रदेशसभा सदस्य निर्वाचित भएका थिए। त्यसअघि उनी दुई पटक जिल्‌ला विकास समितिको सभापति र एक पटक उपसभापति भइसकेका अनुभवी नेता हुन्।