“राष्ट्रभन्दा माथि पार्टीको स्वार्थ राख्दैन बदलिएको कांग्रेस”:सभापति गगन थापा

भक्तपुर-नेपाली कांग्रेसका सभापति गगन थापाले युवाहरूलाई केवल भविष्यका नागरिकका रूपमा होइन, वर्तमानका सक्रिय साझेदारका रूपमा सँगै अघि बढ्ने स्पष्ट सन्देश दिएका छन्।आज एक भिडियो सन्देश सार्वजनिक गर्दै सभापति थापाले भने, “युवाहरू भविष्य हुन् भनेर छाड्ने होइन। युवाहरू अहिलेका साझेदार हुन्। सँगै हिँड्ने हो।”उनले बदलिएको नेपाली कांग्रेस के हो भन्ने विषयमा एकछिन अडिएर सोच्न आग्रह गर्दै कांग्रेसको रूपान्तरण सोच, संकल्प र कार्यशैलीमा आएको परिवर्तन भएको बताए।

सभापति थापाका अनुसार नयाँ कांग्रेस भन्नुको अर्थ पुरानोसँग सम्बन्धविच्छेद होइन। “प्रजातन्त्र, सामाजिक न्याय, विविधता र समावेशीता हाम्रो जरा हो। बदलिएको कांग्रेसले यी जराहरूलाई अझ फैलाउने हो,” उनले भने।हिजोका राम्रा अभ्यासलाई अघि बढाउने र विगतमा भएका कमजोरी सच्याउँदै अब पार्टी र देश यसरी चल्छ भन्ने स्पष्ट मार्गचित्र प्रस्तुत गर्ने उनको भनाइ छ।सभापति थापाले बदलिएको कांग्रेसले राष्ट्रको स्वार्थभन्दा माथि कहिल्यै पार्टीको स्वार्थ नराख्ने स्पष्ट गरे। “सत्तामा पुग्न र टिक्नका लागि जे पनि गर्ने, जोसँग पनि मिल्ने राजनीति अब कांग्रेसले गर्दैन,” उनले भने, “बरू आनन्दले सरकार बाहिर बस्छ।”

उनले पार्टीलाई केवल चुनाव लड्ने मेसिन होइन, सामाजिक आन्दोलनको रूपमा पुनः स्थापित गर्ने प्रतिबद्धता पनि व्यक्त गरे।विगतमा पार्टी सञ्चालनका क्रममा भएका गल्तीका कारण आम नागरिकबाट गुनासा आएको स्वीकार गर्दै थापाले ती गुनासा सम्बोधन गर्न आफूहरूले जोखिम उठाएर सुधारको बाटो अपनाएको बताए।

“तपाईंहरूले सुधारको आह्वान गर्नुभयो, हामीले काम गर्‍यौं। अब गुनासा सम्बोधन गरेपछि हामी हकका साथ भन्छौं— यसपालि हामीलाई मत दिनुहोस्,” उनले भने।
सभापति थापाले पार्टी छाडेका तथा निष्क्रिय बनेकाहरूलाई पुनः कांग्रेसमा फर्कन र सक्रिय हुन आह्वान गरे। साथै, उत्तेजना र घृणाको राजनीति नगर्ने स्पष्ट गर्दै सबैलाई समेटेर अघि बढ्ने संकल्प व्यक्त गरे।“हामी नेपाल सुधार्छौँ, शासन गर्ने गति र मतिलाई बदल्छौँ, र देशलाई ठीक ठाउँमा लैजान्छौँ,” सभापति थापाले आफ्नो भिडियो सन्देशमा उल्लेख गरेका छन्।