“युवा, रोजगारी र सुशासन मेरो प्राथमिकता” : कांग्रेस उम्मेदवार कविर राणा

विपिन ढुंगाना
भक्तपुर-नेपाली कांग्रेसका तर्फबाट भक्तपुर क्षेत्र नम्बर–२ प्रतिनिधि सभा सदस्यका उम्मेदवार कविर राणाले आगामी फागुन २१ गते हुने निर्वाचनलाई लक्षित गर्दै आफ्नो प्रतिबद्धतापत्र सार्वजनिक गरेका छन्।बिहिवार आयोजित पत्रकार सम्मेलनमार्फत उम्मेदवार राणाले लोकतन्त्रको संस्थागत विकास, सुशासन, रोजगारी सृजना, शिक्षा–स्वास्थ्य सुधार र पर्यटन प्रवद्र्धनलाई प्राथमिकतामा राख्दै प्रतिबद्धतापत्र सार्वजनिक गरेका हुन्।

प्रतिबद्धतापत्र सार्वजनिक गर्दै राणाले नेपाली कांग्रेस देशकै सबैभन्दा पुरानो र लोकतन्त्रको पहरेदार पार्टी भएको उल्लेख गर्दै पार्टीले अघि सारेका नीति, सिद्धान्त र संकल्पलाई व्यवहारमा उतार्ने इमानदार प्रयास गर्ने बताए। उनले पार्टीले दिएको जिम्मेवारीलाई मन, वचन र कर्मले पूरा गर्ने प्रतिबद्धता व्यक्त गरेका छन् ।राणाले सुशासन र जवाफदेहितालाई आफ्नो पहिलो प्राथमिकता रहेको उल्लेख गर्दै विगतमा देखिएको राजनीतिक अस्थिरता अन्त्य गर्न संविधान संशोधन आवश्यक भए त्यसमा सक्रिय भूमिका निर्वाह गर्ने बताए।

युवा पलायन रोक्न स्वदेशमै रोजगारी सिर्जना अपरिहार्य रहेको बताउँदै उनले भक्तपुरमा उद्योग, पर्यटन, कृषि, हस्तकला र पूर्वाधार विकासमार्फत रोजगारको वातावरण निर्माण गर्ने प्रतिवद्धता जनाए। निजी क्षेत्रसँगको सहकार्यमा रोजगारी सृजना गर्ने उनको भनाइ रहेको छ ।शिक्षा क्षेत्रमा वर्तमान नीतिलाई व्यवहारमुखी बनाउँदै प्राविधिक तथा व्यावसायिक शिक्षामा जोड दिने, सामुदायिक तथा संस्थागत विद्यालयको गुणस्तर सुधार गर्ने र सानोठिमी तथा भक्तपुर क्याम्पसको स्तरवृद्धिका लागि पहल गर्ने प्रतिबद्धता पनि उनले जनाए।

स्वास्थ्य क्षेत्रतर्फ सूर्यविनायक अस्पताल, भक्तपुर अस्पताल र भक्तपुर क्यान्सर अस्पतालको व्यवस्थापन सुधार गर्दै भक्तपुर अस्पताललाई स्वास्थ्य शिक्षण संस्थाका रूपमा विकास गर्ने योजना रहेको उनले बताए। साथै स्वच्छ पिउने पानीको समस्या समाधान गर्न आशापुरी, नेचालकाला लगायतका सम्भावित स्रोतको उपयोगमा पहल गर्ने प्रतिबद्धता व्यक्त गरे।अव्यवस्थित शहरीकरण नियन्त्रण गर्दै व्यवस्थित विकासमा जोड दिने राणाले प्रमुख तथा भित्री सडक स्तरोन्नति, हुनुमन्ते करिडोर सम्पन्न गर्ने, गोदावरी खोला देखि चरखण्डी खोलासम्म करिडोर निर्माण र ढल निकास व्यवस्थापन गर्ने योजना सार्वजनिक गरे।

पर्यटन प्रवद्र्धनका लागि सूर्यविनायक प्राणी उद्यान, लाकुरी भञ्ज्याङ–साँगा पर्यटन पदमार्ग, केदारनाथको शिर डोलेश्वर, आशापुरी, अनन्तलिंगेश्वर लगायत धार्मिक स्थललाई एकीकृत गरी धार्मिक पर्यटन मार्ग विकास गर्ने प्रतिबद्धता पनि उनले व्यक्त गरे।मध्यपुर थिमिको कला, संस्कृति, जात्रा र पर्व संरक्षण तथा प्रवद्र्धनमा युवाको सहभागिता बढाउने, पर्यटकीय स्थलहरूको व्यवस्थापनका लागि स्थानीय तहसँग समन्वय गर्ने योजना रहेको उनले बताए।

डिजिटल सूचना, सञ्चार प्रविधि (ICT) र कृत्रिम बौद्धिकता (AI) को प्रयोगलाई नीति निर्माणमा प्राथमिकता दिने, सरकारी कार्यालय, विद्यालय र स्वास्थ्य संस्थामा (ICT) विस्तार गर्ने प्रतिवद्धता पनि राणाको प्रतिबद्धतापत्रमा समेटिएको छ।

यसैगरी महिला उद्यमशीलता प्रवद्र्धन, सीप विकास र रोजगारी सृजनाका लागि स्थानीय तह, सीटीईभिटी तथा उद्योग वाणिज्य संघसँग सहकार्य गरी तालिमको व्यवस्था गराउने उनले बताए। साथै उनले आफ्‌नो उम्मेदावरी कोही कसैसंग पनि प्रतिस्पर्धाको लागि नभएको बताए । संविधानको रक्षा, संघीय लोकतान्त्रिक गणतन्त्रको सुदृढीकरण र आर्थिक समृद्धिका लागि भएको बताए ।