स्वीडेनकी प्रधानमन्त्रीले दिइन् राजीनामा

स्वीडेनकी प्रधानमन्त्री माग्दालेना एन्डरसनले राजीनामा दिएकी छन्। उनले नेतृत्व गरेको गठबन्धन आइतवार सम्पन्न निर्वाचनमा पराजित भएपछि उनले राजीनामा दिएकी हुन्।

उनको मध्य-वामपन्थी गठबन्धन झिनो मतान्तरले दक्षिणपन्थी गठबन्धनसँग पराजित भएको छ। ९९ प्रतिशत मतगणना भइसक्दा प्रधानमन्त्री नेतृत्वको गठबन्धनले १७३ सिटमा जित हात पारेको छ भने दक्षिणपन्थी गठबन्धनले १७६ सिटमा जित हात पारेको बीबीसीले जनाएको छ।

अब दक्षिणपन्थी गठबन्धनका तर्फबाट मोडरेट पार्टीका नेता उल्फ क्रिसटेरेसनको नेतृत्वमा सरकार गठन हुनेछ। यस गठबन्धनमा स्वीडेन डेमोक्रेट्स पार्टीसहितका दलहरु छन्।

निर्वाचनको अन्तिम मतपरिणाम आइपुग्न बाँकी नै छ। पुन:मतगणना मार्फत अन्तिम नतिजा सार्वजनिक हुने स्वीडेनमा अभ्यास छ।

प्रधानमन्त्री एन्डरसनले बुधवार पत्रकार सम्मेलन गर्दै हार स्वीकार गरेकी थिइन्। बिहीवार उनले औपचारिक रुपमा राजीनामाको घोषणा गरेकी हुन्।

‘संसद्मा उनीहरुले एक अथवा दुई सिटको फाइदा पाउने छन्। यो झिनो बहुमत हो। तर, पनि यो बहुमत नै हो,’ उनले भनेकी छन्।

उनी स्वीडेनकै पहिलो महिला प्रधानमन्त्री हुन्।

उनी सन् २०२१ को नोभेम्बर २४ मा प्रधानमन्त्री नियुक्त भएकी थिइन्। त्यतिबेला उनले केही घण्टामा नै राजीनामा दिएकी थिइन्। त्यतिबेला उनको सरकारले ल्याएको बजेटलाई गठबन्धनकै दलले पास गर्न अस्वीकार गरेपछि उनले राजीनामा दिएकी थिइन्।

राजीनामा दिएको सातापछि पुन: उनी प्रधानमन्त्री बनेकी थिइन्। त्यहाँको संसद्ले उनको पक्षमा मतदान गरेको थियो।

उनीमाथि त्यहाँका स्वीडेन डेमोक्रेट्स, मोडरेट पार्टी, क्रिस्टियन डेमोक्रेटस् र लिवरल पार्टी सम्मिलत दक्षिणपन्थी गठबन्धनले घेरिरहेको थियो।

सम्पन्न निर्वाचनमा उनको दल सोसियल डेमोक्रेटस् सबैभन्दा ठूलो दल बनेको छ। ९९ प्रतिशत मतगणना सम्पन्न हुँदा उनको पार्टीले १०७ सिट जितेको छ। उनको गठबन्धनमा रहेका वामपन्थी दलले २४ र ग्रिन पार्टीले १८ सिट जितेका छन्।