ऐन कार्यान्वयन भएपनि छुवाछूतको घटनाले १४ वर्षमा १७ जना दलितको ज्यान गयो ।

भक्तपुर – १४ वर्ष पूरा भए पनि जातीय भेदभाव तथा छुवाछूतको घटनामा अझै कमी हुन सकेको छैन। ऐन कार्यान्वयनपछि १७ जना दलित समुदायका व्यक्तिहरूको हत्या भएको छ भने कैयौँ सामाजिक बहिष्करणमा परेका छन्। दलित अधिकारकर्मीहरूले जातीय भेदभाव अन्त्यका लागि ऐनको प्रभावकारी कार्यान्वयन आवश्यक रहेको पनि बताएका छन् ।
सो अवधिमा पानी, चुल्हो छोएको र अन्तजातीय विवाह गरेको निहुँमा १७ जना दलित समुदायका व्यक्तिको हत्या भएको छ भने कैयौँ जनालाई सामाजिक बहिष्करणमा परेको समता फाउन्डेशनले जनाएको छ । छुवाछूतका घटनालाई गाउँमै मिलापत्र गर्ने, प्रहरी प्रशासनले ऐनबारे अनविज्ञता प्रकट गर्दै उजुरी दिन आनाकानी गर्ने र यदि उजुरी दर्ता गरेपनि पीडककै पक्षमा फैसला हुने गरेको अध्यक्ष परियार बताउँछन् ।

अन्तरजातीय विवाह गरेकै कारण थुप्रै जोडी र दलित परिवार विस्थापित समेत भएका छन । दलित समुदायमाथि भइरहेको जातीय भेदभाव तथा छुवाछूतलाई पूर्ण रुपमा अन्त्य गर्न ऐनको व्यावहारिक रुपमै प्रभावकारी कार्यान्वयन गर्नुपर्ने दलित अधिकारकर्मी बताउँछन् ।