आफनो मनोमानीले पुल बेच्ने वडाअध्यक्ष पक्राउ, स्थानीय भने आक्रोशित ।

भक्तपुर- सरकारी सम्पत्ति सम्बन्धित पक्षसँग समन्वय नगरी पुल बेचेको आरोपमा काभ्रेको रोशी गाउँपालिका–७ का वडाध्यक्ष अशोक कुमार गौतम पक्राउ परेका छन् । वडाअध्यक्ष गौतमलाई आज अदालतबाट म्याद थप गराएर अनुसन्धान गर्ने तयारी भएको छ ।

गत असोजमा रोशी खोलमामा आएको बाढीले बगाएको फलामको पक्की पुल र झोलुङ्गे पुल व्यक्तिगत रुपमा मनोमानी गरेर कबाडीलाई बिक्री गरेको आरोप वडाध्यक्षलाई हिजो सोमबार जिल्ला प्रहरी कार्यालय काभ्रेको टोलीले काभ्रे भन्ज्याङ्गबाट पक्राउ गरेको जिल्ला प्रहरी कार्यालयका डीएसपी एवं सूचना अधिकारी मिनबहादुर घलेले जानकारी दिनुभएको छ ।

कटुन्जेबेशीबाट रघुचौरहुँदै खार्पाचोक, कालिन्चोक र वाइबाडाडा जाने झोलुङ्गे पुल वडा अध्यक्ष गौतमले आफनो ढंगबाट बिक्री वितरण गरेको भन्दै स्थानीय आक्रोशित भएका थिए । खोलामा रहेको पुल काटेर कबाडीले ट्रकमा लोड गर्न थालेपछि स्थानीय र कबाडीवालाबीच केही विवाद भएको थियो । वडा अध्यक्षको निर्देशनमा सामान ढुवानी हुन् थालेपछि स्थानीयले प्रहरीलाई सूचना दिएका थिए ।