भाद्र शुक्ल पञ्चमीका दिन आज ,ऋषि पञ्चमी पर्व मनाइँदै ।

भक्तपुर – आज भाद्र शुक्ल पञ्चमीका दिन ऋषि पञ्चमी पर्व श्रद्धा र भक्तिपूर्वक मनाइँदै छ । यो पर्व विशेषगरी महिलाहरूले मनाउने गर्दछन । ऋषि पञ्चमीको दिन ब्रत बसेर सप्तऋषिहरूको पूजन–आराधना गर्ने परम्परा समेत रहेको छ ।

धार्मिक विश्वासअनुसार तीज र हरितालिका व्रतका क्रममा अनजानेमा भएका दोष पापको निवारण ऋषि पञ्चमीमा स्नान र पूजाबाट हुने मान्यता रहेको छ । बिहान सबेरै उठी अरुणोदयको समयमा नदी, तलाउ वा कुण्डमा गई स्नान गरी दन्तधावन गरेर सात ऋषिहरू (कश्यप, अत्रि, भारद्वाज, विश्वामित्र, गौतम, जमदग्नि र वसिष्ठ) को पूजा गर्ने चलन छ।

यस दिन महिलाहरूले चोखो वस्त्र लगाई ब्रत बसेर शुद्धताका साथ पूजा गरेमा घर–परिवारमा सुख–शान्ति, समृद्धि र पवित्रता प्राप्त हुने धार्मिक विश्वास छ । देशभरका मठ–मन्दिर, नदी घाट तथा धार्मिक स्थलहरूमा बिहानैदेखि भक्तजनहरूको घुइँचो लागेको छ ।