भारतको कोलकातामा करेन्ट प्रवाह हुँदा १० जनाको मृत्यु।

असोज ९, २०८२ बिहीबार
भक्तपुर-भारतको पश्चिम बंगालको राजधानी कोलकातामा पानीमा करेन्ट प्रवाह हुँदा १० जनाको ज्यान गएको छ । स्थानिय सञ्चारमाध्यमका अनुसार अविरल वर्षाले सहरका विभिन्न भाग डुबानमा परेपछि खुला तार तथा विद्युत् उपकरणमा करेन्ट फैलिएको हो । १२ घण्टा सम्म परेको पानीले शहरको ठूलो भाग डुबानमा पारेको समाचार संस्था सिन्ह्वाले जनाएको छ ।

पानीमा हिँड्ने क्रममा करेन्ट लागेर केही व्यक्तिको घटनास्थलमै मृत्यु भएको र अन्यलाई अस्पताल लगिएको जनाइएको छ। यसले जनजीवन प्रभावित भएको छ । जसले गर्दा गाडीको आवागमन र दैनिक गतिविधिहरू प्रभावित भएका छन् । वर्षाको कारण सडक, गल्ली र आवासीय क्षेत्र जलमग्न भएपछि उद्धार कार्यमा कठिनाइ भएको अधिकारीहरूले जनाएका छन्। स्थानीय प्रशासनले उच्च सतर्कता अपनाउन र विद्युत् उपकरणबाट टाढा रहन सर्वसाधारणलाई आग्रह गरेको छ।

बेनियापुकुर, कालिकापुर, नेताजी नगर, गरियाहाट, एकबलपुर, बेहला र हरिदेवपुर क्षेत्रहरूमा छुट्टाछुट्टै घटनाहरूमा ज्यान गएको छ । भारतीय मौसम विज्ञान विभागका अनुसार २४ घण्टाभन्दा कम समयमा २५१.४ मिलिमिटर वर्षा भएको छ । वर्षाले कोलकाता विमानस्थलमा पनि उडान सञ्चालनमा असर पारेको छ । रिपोर्टहरूले १०० भन्दा बढी उडानहरू प्रभावित भएको, ६२ रद्ध गरिएको र ४२ अन्य ढिलाइ भएको बताएको छ ।