राष्ट्रपति सी जीन पिङ आज क्यानडा, जापान र थाइल्याण्डका शीर्ष नेतासँग वार्तामा ।

भक्तपुर – चिनियाँ राष्ट्रपति सी जीन पिङले आज क्यानडा, जापान र थाइल्याण्डका शीर्ष नेताहरूसँग छुट्टाछुट्टै भेटवार्ता गर्ने भएका छन् । यी भेटवार्ताहरूले एशिया–प्रशान्त क्षेत्रको राजनीतिक र आर्थिक सम्बन्ध सुदृढ गर्ने अपेक्षा गरिएको छ । राष्ट्रपति सीले जापानी प्रधानमन्त्री फुमियो किसिदासँग द्विपक्षीय सम्बन्धमा उत्पन्न केही विवादास्पद विषय, विशेषगरी पूर्वी चीन सागरको समुद्री सीमाको विषयमा छलफल गर्ने तयारी गरेका छन्।

त्यसैगरी क्यानडाका प्रधानमन्त्री जस्टिन ट्रुडोसँगको भेटमा व्यापारिक सम्बन्ध, लगानी वातावरण र उत्तर अमेरिकी सहयोगका एजेन्डा रहने जनाइएको छ। थाइल्याण्डका प्रधानमन्त्री स्रेत्था थाभिसिनसँगको वार्तामा भने पर्यटन, लगानी र क्षेत्रीय आर्थिक सहकार्यमा जोड दिइने बताइएको छ । चीनले हालै कूटनीतिक सक्रियता बढाउँदै विभिन्न मुलुकहरूसँग उच्चस्तरीय सम्पर्क विस्तार गरिरहेको छ, जसलाई विश्लेषकहरूले ‘चीनको नयाँ क्षेत्रीय सन्तुलन रणनीति’का रूपमा व्याख्या गरेका छन ।