कामपा मेयर बालेन्द्र शाह (बालेन)विरुद्ध अदालतको अवहेलना मुद्दा दर्ता

काठमाडौं महानगरपालिकाका मेयर बालेन्द्र शाह (बालेन)विरुद्ध अदालतको अवहेलना मुद्दा दर्ता भएको छ । अधिवक्ता दीपकराज जोशीले बालेनविरुद्ध अपहेलनाको मुद्दा हालेका हुन् । नर्भिक इन्टरनेसनल हस्पिटललाई महानगरले नक्सा पास नगरी नियमविपरीत बनाइएका संरचना भत्काउन २४ घण्टे अल्टिमेटम दिएको थियो । त्यसपछि नर्भिकले सर्वोच्चमा रिट दायर गरेकोमा उक्त रिटको सुनुवाइ गर्दै सर्वोच्चले महानगरको उक्त निर्णय तत्काल कार्यान्वयन नगर्न अल्पकालीन अन्तरिम आदेश दिएको थियो । त्यसको प्रतिक्रियास्वरुप बालेनले संविधान संशोधन गरेर भए पनि नक्सा पास गर्ने अधिकार सर्वोच्चलाई दिनुपर्ने टिप्पणी गरेका थिए । ‘नक्सा पास नगरी बनाएका संरचनाहरूलाई कारबाही गर्ने तथा नक्सा पास गर्ने अधिकार बरु संविधान नै संशोधन गरेर सर्वोच्च अदालतलाई दिने व्यवस्था गर्न हार्दिक अनुरोध गर्दछौँ,’ बालेनले फेसबुकमा लेखेका थिए । बालेनको उक्त स्टाटसले अदालतको अवहेलना गरेको भन्दै जोशीले रिट दायर गरेका हुन् ।