मेमोरी किङ्ग अर्पण शर्मा अन्तराष्ट्रिय स्तरको ‘सर्टिफिकेट अफ अनर’ द्वारा सम्मानित

काठमाडौं। ‘मेमोरी किङ’ अर्पण शर्माले इंग्ल्यान्डको ग्लोबल बुक अफ एक्सिलेन्सबाट सम्मान स्वरूप सर्टिफिकेट अफ अनर प्राप्त गरेका छन्। स्मरणशक्ति प्रशिक्षणमा पुर्‍याएको योगदानको कदर गर्दै, ग्लोबल बुक अफ एक्सिलेन्सले उनलाई काठमाडौँमा आयोजित एक कार्यक्रममा यो अवार्ड प्रदान गरेको हो। यो सम्मानपत्रमा यूकेका अध्यक्ष म्यानुअल एन्टोनियो र भारतका अध्यक्ष मनीष कुमारको हस्ताक्षर रहेको छ।

बेलायतको ग्लोबल बुक अफ एक्सिलेन्सले समाजमा महत्वपूर्ण योगदान दिने व्यक्तिहरूलाई सम्मान गर्दै आएको छ। अर्पण शर्मालाई यो अवार्ड प्रदान गर्नुले उनको कडा परिश्रम र समर्पणलाई अन्तर्राष्ट्रिय स्तरमा उच्च सम्मान दिएको हो। उक्त संस्थाले शर्माको शिक्षणले मानिसहरूलाई सकारात्मक प्रभाव पारेको उल्लेख गर्दै, उनलाई स्मरणशक्ति र ध्यानको क्षेत्रमा विशेष योगदान गर्ने व्यक्तिको रूपमा स्वीकार गरेको छ।

ललितपुरमा जन्मिएका शर्मा अहिले विश्वव्यापी मेमोरी ट्रेनरको रूपमा स्थापित भइसकेका छन्। स्मरणशक्ति र ध्यान प्रविधिको माध्यमबाट व्यक्तिको क्षमता विकास गर्ने उद्देश्यले उनी निरन्तर सेमिनारहरू सञ्चालन गर्दै आएका छन्। यसअघि उनले एक मिनेटमा ८३ वस्तुहरूको क्रम सम्झिएर विश्व कीर्तिमानी समेत बनाइसकेका छन्, जसले उनलाई अन्तर्राष्ट्रिय स्तरमा अझै ख्याती दिलाएको छ।