“भक्तपुरमा गुञ्जिए गायक केकेका अमर गीतहरू: तेस्रो पुण्यतिथिमा भव्य सांगीतिक श्रद्धाञ्जली”

भक्तपुर-भारतीय ईण्डियन फिल्म क्षेत्रका एक नामुद कलाकार गायक कृष्णकुमार कुन्नथ ‘केके’ को तेस्रो पुण्यतिथिको अवसरमा भक्तपुरमा आयोजना गरिएको सांगीतिक श्रद्धाञ्जली कार्यक्रम मन छुने बन्यो। केकेप्रति श्रद्धा अर्पण गर्न आयोजित कार्यक्रममा उनका सदाबहार गीतहरू गुञ्जिए, र उपस्थित हरेक दर्शक भावविह्वल भए।

कार्यक्रम भक्तपुरको रमणीय कौसी रेष्ट्रोमा भव्यरूपमा सम्पन्न भएको छ । श्रद्धाञ्जली कार्यक्रमको प्रमुख अतिथि वरिष्ठ साहित्यकर्मी सुबास चन्द्र ढुंगेल, विशिष्ट अतिथि भक्तपुर सांगीतिक समाजका अध्यक्ष अल्बर्ट बज्राचार्य, तथा आराधना सांगीतिक समूह र संगीतग्राम गुरुकुल नेपालका प्रतिनिधिहरू थिए। अतिथिहरूले केकेको तस्बिरमा पुष्प गुच्छा अर्पण गर्दै हृदयदेखि श्रद्धाञ्जली व्यक्त गरे।

कार्यक्रमको विशेष आकर्षण गायक प्रविन शाही थिए, जसले केकेका १६ ओटा अमर गीतहरू मार्फत भावनात्मक यात्रा गराए। ‘पल’, ‘तडप तडप’, ‘यारों दोस्ती’ जस्ता गीतहरूले कौसी रेष्ट्रोको वातावारणलाई भावुक बनाएको थियो । एकल प्रस्तुति दिएका शाहीले संगीतमार्फत केकेलाई जीवित बनाए। कार्यक्रमको सञ्चालन तिर्थ नेपालीले गरेका थिए ।

सो श्रद्धाञ्जली कार्यक्रममा सहकार्य सहयोगी संस्था गुडविल कन्सल्ट रेडियो पार्टनर रेडियो मस्ती,अनलाइन पार्टनर नेपालीको आवाज संवाहक डटकम,भेन्यु पार्टनर कौसी रेष्ट्रो,फोटोग्राफर,सरोज सिमाछ्वा, सुरज शाही टेक्निकल सहयोगी विवेक शाक्य,कार्यक्रम व्यवस्थापक रोशन धौभडेल, रबिन थापा लगाएतका व्यक्तिहरुलाई कार्यक्रमको समापनमा आयोजक प्रविन शाहीले सहयोग गर्ने सम्पूर्ण व्यक्तित्व र संस्थाहरूलाई ‘मायाको चिनो’ प्रदान गर्दै धन्यवाद ज्ञापन गरेका थिए ।

गायक, गीतकार, संगीतकार, पत्रकार र संगीतप्रेमीहरूको बाक्लो उपस्थिति रहेको कार्यक्रमले संगीतप्रति समर्पण र सम्झनाको शक्तिलाई पुनः उजागर गरेको गायक शाहीले उज्यालो समाचारलाई बताए ।आयोजक शाहीले भने, “केकेको संगीतले जुन पुस्तालाई छोयो, हामी त्यो प्रभावलाई जिन्दगीभर सम्झिरहनेछौं।“ उनले यस्ता कार्यक्रमहरूलाई आगामी दिनहरूमा पनि निरन्तरता दिने प्रतिबद्धता व्यक्त गरे।