सम्पर्क विहीन भएका हायू परिवार, पोखरामा फेला ।

भक्तपुर – सिन्धुलीको गोलन्जोर गाउँपालिका–६ छेत्पाको आफ्नै घरबाट हराएका १६ जना परिवार पोखरामा फेला परेका छन् । जिल्ला प्रहरी कार्यालय कास्कीका अनुसार उनीहरूलाई गगनगौंडाको एउटा घरमा बसिरहेको अवस्थामा हिजो बेलुकी साँझा फेला परेको कास्कीका प्रहरी कार्यालयले जानकारी दिएको छ । हिजो हराएको समाचार सार्वजनिक भएपछि होटल सञ्चालकले प्रहरीलाई खबर गरेका थिए ।

त्यसपछि सीसीटीभीको आधारमा उनीहरू बसेको ठाउँ पत्ता लागेको प्रहरीले जनाएको छ । सिन्धुलीमा काम नपाएपछि । उनीहरुले पोखरामा ज्यामी काम गर्नका लागि आएको बताएका छन् । परिवारकै १६ जना बिहीबारदेखि सम्पर्कविहीन भएको खबर हिजो दिनभर नै चर्चामा रहेको थियो । १६ जनामध्ये एक ज्वाइँ र छोरी पोखराकै रहेको तथा अर्को छोरी काठमाण्डौमा बस्ने गरेको प्रहरीले जनाएको छ । गाउँको एकान्तमा रहेको घरमा हिजो प्रहरी सहितको टोली पुग्दा समेत कोही नभेटिए पछि सम्पर्कविहीन भएको भन्दै उनीहरुको खोजी गरिएको थियो ।

घरका सबै सदस्य रहस्यमयी तरिकाले सम्पर्कविहीन भएपछि छिमेकीले नै जनप्रतिनिधि र प्रहरीलाई खबर गरेका थिए । प्रहरीका अनुसार उनीहरु बिहीवार राति गाडी रिजर्भ गरेर सिन्धुली, हेटौँडा, मुग्लिन हुँदै पोखरा पुगेका हुन् । घरबाट बाहिरिँदा हायू परिवारले ६ वटा बाख्रा त्यत्तिकै छोडेर गएका थिए । खोरमा बाख्रा बाँधेर तथा कुकुर छाडेर छरछिमेकी कसैलाई पनि जानकारी नदिई सम्पर्कविहीन भएपछि उनीहरुको बारेमा खोजी कार्य भएको थियो ।