खीरकै लागि भोलि देशभर ८० लाख लिटर दूध खपत हुने ।

भक्तपुर – भोलि खीर खाने दिन झन्डै ८० लाख लिटर दूध खपत हुने नेपाल डेरी एसोसिएशनले अनुमान गरेको छ । खीर खाने दिवस मौलिक संस्कृतिसँग जोडिएको दिन पनि हो । परम्परादेखि नै किसानहरूले साउन १५ गते खीर खाने चलन छ ।

रोग प्रतिरोधात्मक क्षमता बढी हुने भएकाले असार–साउनको हिलोमा काम गरेका किसानको स्वास्थ्यका लागि खीर लाभदायक हुने आधुनिक विज्ञानले पनि प्रमाणित गरेको छ । खीर दिवसका अवसरमा झन्डै एक अर्ब ४० करोड रुपैयाँको कारोबार हुने अनुमान गरेको एसोसिएशनका अध्यक्ष प्रह्लाद दाहालले जानकारी दिनुभयो । उहाँका अनुसार उपभोक्ताको माग अनुसार बजारमा दूध उपलब्ध हुने छ ।

सामान्य दिनमा भन्दा करिब दोब्बर दूध बिक्री हुने भएकाले डेरी उद्योग, किसान, तथा खुद्रा विक्रेताहरू सबै तयारीमा जुटेका छन्। नेपाल डेरी एसोसिएसनले परिवारका सदस्यहरू सँगै बसेर खीर खाई किसानको उत्पादनको उपभोगसँगै पारिवारिक आनन्दसमेत लिन आग्रह गरेको छ ।