रवि लामिछानेलाई हस्ताक्षर गर्ने अनि कांग्रेसको कृयाशील सदस्यता लिने? — सांसद दुर्लभ थापाको कटाक्ष

तिर्थ नेपाली
साउन १७ भक्तपुर— भक्तपुर क्षेत्र नं. २ का संघीय सांसद दुर्लभ थापाले नेपाली कांग्रेसको कृयाशील सदस्यता लिने व्यक्तिहरूले राष्ट्रिय स्वतन्त्र पार्टी (रास्वपा) अध्यक्ष रवि लामिछानेलाई समर्थन गर्दै हस्ताक्षर अभियानमा भाग लिनु अनैतिक भएको टिप्पणी गरेका छन्।शनिबार सूर्यविनायक नगरपालिकाको तेस्रो नगर सम्मेलनमा बोल्दै सांसद थापाले भने, “एकातिर कांग्रेसको कृयाशील सदस्यता लिने अनि अर्कातिर रवि लामिछानेलाई समर्थन गर्दै हस्ताक्षर अभियान चलाउने — यस्तो दोहोरो चरित्र कुन नैतिकताले स्वीकार्छ?“

उनले रवि लामिछानेविरुद्ध सरकारले प्रतिशोध राखेको भन्ने टिप्पणीप्रति आपत्ति जनाउँदै यस्ता दोहोरो भूमिकाले कांग्रेसको छवि धमिलिने बताए।सांसद थापाले कांग्रेस बलियो हुन संगठनहरू सुदृढ गर्नुपर्नेमा जोड दिए। “कांग्रेसका भातृ संगठनहरूको अधिवेशन समयमै हुनुपर्छ, सदस्यता समयमै नवीकरण गर्नुपर्छ, महाधिवेशन नियमित हुनुपर्छ — यिनै कुराहरूले कांग्रेसलाई सबल बनाउँछ,“ उनले भने।

विकासका सन्दर्भमा बोल्दै थापाले स्थानीय सरकारलाई ’घरदैलो सरकार’ को रूपमा चिनाउँदै जनताले स्थानीय सरकारलाई निरन्तर निगरानीमा राख्नुपर्ने बताए। साथै, अहिलेको सामाजिक सञ्जाल र कृत्रिम बुद्धिमत्ताको युगमा देखिने सतही विकासभन्दा वास्तविक तथा दिगो विकासका लागि सबै पक्षले आ–आफ्नो ठाउँबाट योगदान गर्नुपर्ने आवश्यकता औँल्याए।