वीरगञ्जमा हैजा प्रकोपः ३० भन्दा बढी बिरामी, ६जनामा पुष्टि ।

पर्सा जिल्लाको  वीरगञ्ज महानगरपालिका–१२ मुर्लीस्थित नयाँ टोलमा हैजाका बिरामी भेटिएका छन्। शुक्रबार साँझ एकै दिनमा ३० जनाभन्दा बढीमा झाडापखाला देखिएपछि गरिएको परीक्षणमा छ जनामा हैजाको जीवाणु (कोलेरा) पुष्टि भएको हो।

तराई हस्पिटलमा बिरामीको चाप बढेपछि गरिएको परीक्षणमा हैजाको जीवाणु पाइएको महानगरको स्वास्थ्य शाखाले जनाएको छ। नारायणी अस्पताल र जिल्ला स्वास्थ्य कार्यालय पर्साको समन्वयमा शुक्रबार अबेर रातसम्म तीन र शनिबार बिहान थप तीन गरी छ जनामा हैजा पुष्टि भएको हो।

जिल्ला स्वास्थ्य कार्यालय पर्साका जनस्वास्थ्य अधिकृत जयमोद ठाकुरले करिब दस वर्षपछि पर्सामा हैजाको प्रकोप देखिएको बताए। उनका अनुसार हैजा विस्तारै फैलिने संकेत देखिएकाले समयमै सतर्कता नअपनाए महामारीको रूप लिन सक्ने जोखिम छ।

स्वास्थ्य निकायले हैजाको प्रकोप विकराल हुन नदिन सरसफाइमा ध्यान दिन, सुरक्षित पानी पिउन र सतर्क रहन सबैलाई आग्रह गरेको छ।