बिहान शव फेला परेको धोबीखोलामा: नागरिककै पहलमा फलामे बार

भक्तपुर-धोबीखोला करिडोरको रूद्रमति पुलनिर बिहीबार बिहान एक पुरुषको मृत्यु भएपछि त्यही क्षेत्रमा सुरक्षा बढाइदै फलामे बार जडान गरिएको छ। काठमाडौं महानगरपालिका–२९ अन्तर्गत पर्ने रूद्रमति पुलनजिकै रेलिङ नभएको करिब पाँच मिटर खण्डमा बार नहुँदा निरन्तर दुर्घटना हुने क्रम बढेपछि हाम्रो टिम नेपालका अध्यक्ष विमल पन्तले आफ्नै पहल र खर्चमा फलामे बार जडान गरिदिएका हुन्।

बिहान ५० वर्षीय ललित गिरी साइकलसहित खोलामा खसेर मृतावस्थामा फेला परेपछि स्थानीयको ध्यान फेरि सुरक्षा व्यवस्थामाथि गयो। प्रहरीको प्रारम्भिक अनुसन्धान अनुसार पुलछेउ रेलिङ नहुँदा उनी सिधै खोलामा खसेका हुन्।

विमल पन्तका अनुसार त्यहाँ पहिले पनि धेरै गम्भीर दुर्घटना हुँदै आएका थिए।‘यहाँबाट पटक–पटक मान्छे खसेर दुर्घटना भइरहेको थियो। पहिले कार, मोटरसाइकल पनि खसे। आज त एक जनाको ज्यानै गयो,’ पन्तले भने, ‘त्यसैले म पुगेँ र आफ्नै खर्चमा फलामे बार लगाइदिएँ।’स्थानीयले पनि बार जडानपछि सो क्षेत्रमा दुर्घटना रोकथाममा ठूलो मद्दत हुने विश्वास व्यक्त गरेका छन्।