लाइसेन्स पास गराइदिने नाममा ठगी: भक्तपुरसहित यातायात कार्यालयबाट १४ जना पक्राउ

भक्तपुर – यातायात व्यवस्था कार्यालय राधे राधे भक्तपुर, गुर्जुधारा काठमाण्डौ तथा काठमाण्डौ तथा यातायात कार्यालय ट्रायल सेन्टर दक्षिणढोका लगायतका ठाउँबाट १४ जना बिचौलिया पक्राउ परेका छन् ।उनीहरूले काम छिटो गराइदिने भन्दै सेवाग्राहीलाई दुःख–हैरानी दिने तथा यातायात व्यवस्था कार्यालयका कर्मचारीको दैनिक काम कारबाहीमा समेत प्रभाव पार्ने गरेका काठमाण्डौ उपत्यका अपराध अनुसन्धान कार्यालयले जनाएको छ ।

पक्राउ पर्नेहरूमा सिन्धुपाल्चोकका झमकलाल श्रेष्ठ, दीपा कटुवाल र दिवस लामा, काभ्रेका अनिमेष अवा, सन्तोष स्याङतान र दिलिप खड्गी, दोलखाका बासु खड्का, झापाका भीमबहादुर नेम्वाङ, काठमाण्डौका प्रदीप श्रेष्ठ, शर्मिला चौलागाईं र रन्जित महर्जन, पर्वतका दुर्गाप्रसाद न्यौपाने, नवलपरासी पूर्वका अर्जुन चौधरी, सुनसरीका सरोज ढुङ्गाना रहेका छन् ।

साथै उनीहरूले लाइसेन्स प्रिन्ट र ब्लु बुक लगायतका कागजात नवीकरण सहज तरिकाबाट गरिदिने भन्दै थप रकम लिने, मेडिकल फेल भएकाहरूलाई पास गराइदिने भन्दै थप रकम लिने गरेका प्रहरीले जनाएको छ ।उनीहरूले लिखित र ट्रायल फेल भएकाहरूलाई यातायात कार्यालयका कर्मचारीसँग चिनजान रहेको र पास गराइदिने भन्दै १० हजार रुपैयाँसम्म लिने गरेका खुलेको छ ।