रवि लामिछानेको बन्दी प्रत्यक्षीकरण सम्बन्धी रिट निवेदन प्रधान न्यायाधीको संयुक्त इजलासमा ।

रास्वपा का सभापति तथा पूर्वगृहमन्त्री रवि लामिछानेको आज बन्दी प्रत्यक्षीकरण सम्बन्धी रिट निवेदन प्रधानन्यायाधीश प्रकाशमान सिंह राउत र न्यायाधीश नित्यानन्द पाण्डेयको संयुक्त इजलासमा परेको छ। सो रिटमा निवेदन यसअघि पाँच पटकसम्म हेर्न नमिल्ने न्यायाधीशहरूको इजलासमा परिरहेको थियो। तर, आज छैटौं पटक भने हेर्न मिल्ने इजलासमा पेसी तोकिएको छ ।

सुप्रिम सहकारी ठगी मुद्दामा संलग्न रहेका रवि लामिछानेलाई रुपन्देही जिल्ला अदालतले एक करोड रुपैयाँ धरौटीमा रिहा गरको थियो । तर सरकारी वकिलको कार्यालयले उच्च अदालत बुटवलमा पुनरावेदन गरेपछि उच्च अदालतले चैत २२ गते थुनामा राख्न आदेश दिएको थियो । त्यसै आधारमा लामिछाने पुनः पक्राउ परेका थिए ।

आफूलाई गैरकानुनी रूपमा पक्राउ गरेर तीन दिनपछि मात्रै कारागार चलान गरिएको भन्दै उनले सर्वोच्च अदालतमा बन्दी प्रत्यक्षीकरणको रिट दायर गरेका हुन्। साथै, उच्च अदालतको थुनामा राख्ने आदेश बदर गर्न पनि माग गरिएको छ । हाल रवि लामिछाने रुपन्देही जिल्ला कारागारमा थुनामा रहेका छन्। सोही मुद्दाका अर्का प्रतिवादी पूर्वडीआईजी छविलाल जोशी पनि सोही कारागारमा छन्।