“गर्मीले थाकेका काठमाडौंवासीलाई साँझको वर्षाले दियो राहत”

भक्तपुर-मंगलबार दिनभरि उखरमाउलो गर्मीले आक्रान्त बनेको काठमाडौं उपत्यकामा साँझपख परेको वर्षाले सर्वसाधारणलाई राहत दिएको छ। वर्षासँगै तापक्रममा गिरावट आएपछि मौसम शीतल बनेको छ।काठमाडौंको अधिकतम तापक्रम मंगलबार दिउँसो ३० डिग्री सेल्सियस पुगेको थियो। साँझपख परेको पानीले तापक्रम घटाएर २८ डिग्री सेल्सियसमा झारिदिएको मौसम विभागले जनाएको छ।

जल तथा मौसम विज्ञान विभागले बुधबारदेखि हल्का वर्षाको सम्भावना समेत देखाएको छ। केही समययता वर्षा नहुँदा उपत्यका, तराई–मधेसलगायत अधिकांश क्षेत्रमा तापक्रम बढेको छ।

महाशाखाका मौसमविद् प्रतिमा मानन्धरले देशको पश्चिम र मध्य भू–भागमा पश्चिमी वायु र स्थानीय वायुको प्रभाव रहेको र कोशी प्रदेशका भू–भागमा मनसुनी वायु सक्रिय रहेको जानकारी दिइन्।“मनसुनी हावा सक्रिय नहुँदा पूर्वी क्षेत्रमा मनसुन फैलिन समय लागेको छ। यस कारण गर्मी बढेको छ, तर कोशी, बागमती र लुम्बिनीका केही जिल्लामा हल्का वर्षा भइरहेको छ,” उनले भनिन्।

बुधबारदेखि काठमाडौंसहितका विभिन्न स्थानमा वर्षा हुने सम्भावना रहेकाले तापक्रममा गिरावट आउने महाशाखाको भनाइ छ।”गर्मीले थाकेका काठमाडौंवासीलाई साँझको वर्षाले दियो ठूलो राहत”आज भैरहवा, धनगढी र नेपालगञ्जमा तापक्रम ४१ डिग्रीसम्म पुगेको छ भने दिपायलमा ३९ र सिमरा, जनकपुर, बिराटनगरमा ३८ डिग्रीसम्म पुगेको छ।

महाशाखाले आगामी दिनमा मेघगर्जनसहित हल्का देखि मध्यम वर्षाको सम्भावना रहेको र जनजीवन, कृषि तथा यातायातमा प्रभाव पर्ने चेतावनी दिएको छ। सम्भावित जोखिमबाट बच्न सतर्कता अपनाउन महाशाखाले अनुरोध गरेको छ।